Deputat istifadə etdiyi “Azərbaycan cəmiyyətinin “otxod”ları” ifadəsinə aydınlıq gətirib
Milli Məclisin deputatı Astan Şahverdiyev ictimaiyyət tərəfindən rezonans doğuran ifadəsinə aydınlıq gətirib.
Belə ki, yaxın günlərdə millət vəkili Astan Şahverdiyev “Azadlıq Radiosu”na müsahibə verib. Müsahibə zamanı Biləsuvarda dekabrın 22-də baş tutmuş aksiya iştirakçılarını “narkoman və əyyaş” adlandırıb.
Aksiyanın səbəbi 20 min sakinin yaşadığı 11 qəsəbədə işıqların tez-tez kəsilməsi olub.
“Onlar arasında əyyaş və cəmiyyətin digər tullantıları da var” – deyə “Azadlıq Radiosu” deputatın sözlərini sitat gətirir.
Daha sonra deputat Rusiyaya qazanc dalınca gedən azərbaycanlılar haqda qeyd edib ki, onlara görə bütün xalq haqqında mənfi fikir formallaşır:
“Bilirsiniz səbəb nədir? Mən bu məsələni araşdırmışam. Bilirsiniz Rusiyaya kimlər gedir? Cəmiyyətin “otxod”ları gedir”.
Bu müsahibə Azərbaycan ictimaiyyəti arasında mənfi reaksiyaya səbəb olub. Bununla bağlı deputat təəssüflə bildirib ki, bu kobud ifadəni işlətmək istəməzdi (Modern.az-ın sitatı):
“Fikirlərimi düzgün ifadə etməmişəm. Buna görə də təəssüf hissi keçirirəm ki, ifadəm belə alınıb”.
Astan Şahverdiyev bildirib ki, Biləsuvarda baş verən hadisə ilə bağlı “Azadlıq Radiosu”ndan ona zəng ediblər:
“Oradakı yaralı polisləri gördükdən sonra stres keçirdim. Bu vaxt mənə zəng etdilər. Mən insanları təhqir etmək istəməzdim”.
“Mən Avropada, Rusiyada elə sahibkarlar tanıyıram ki, onlar Azərbaycan xalqını yüksək səviyyədə təmsil edilər. Digər tərəfdən də etiraf edək ki, xalqımıza layiq olmayan tərzdə də təmsil olunuruq. Bu yaxınlarda Tümen şəhərindən olan bir nəfər alim mənə dedi ki, “sizin adamlar bazar adamlarıdır”. Mən həmin vaxt lazımi səviyyədə onun cavabını verdim”, - deyə deputat bildirib.
Bununla yanaşı o, etiraf edib ki, düzgün ifadə işlətməyib:
“Fikirlərimi düzgün ifadə etməmişəm. Buna görə də təəssüf hissi keçirirəm ki, ifadəm belə alınıb. İndi mənim ünvanıma yazırlar ki, “Astan Şahverdiyev Azərbaycan üçün nə edib?”. Demək istəyirəm ki, mən elmi sahədə Azərbaycanı bütün Avropaya tanıtmışam. Mənim iştirak etdiyim seminarlar, toplantılar və Avropa Birliyilə yerinə yetirdiyim layihə sübut edir ki, mən bu xalqa nə cür bağlıyam. Bunlar çox da döşlərinə döyməsinlər. Mən elmi fəaliyyətimi davam etdirmək üçün 1993-cü ildə İstanbula getməliydim, amma rayon işğal olunduğuna görə getmədim”.
Qeyd edək ki, deputatın modern.az-a şərhlərinin həqiqliyini 1news.az-ın müxbirinə onun köməkçisi təsdiqləyib.
1news.az
