Səfir: Azərbaycanın məhsullarının Səudiyyə Ərəbistanına ixracı üçün imkanlar araşdırılır
Səudiyyə Ərəbistanı Krallığı ilə Azərbaycan arasındakı siyasi əlaqələrin yüksək səviyyədə olması iqtisadi, ticarət, investisiya və turizm sahəsində əməkdaşlığı inkişaf etdirməyə kömək edir.
1news.az xəbər verir ki, bunu Azərbaycanın Səudiyyə Ərəbistanındakı səfiri Şahin Abdullayev “Saudi Gazette”yə müsahibəsində deyib.
O bildirib ki, Səudiyyə Ərəbistanı Dağlıq Qarabağ münaqişəsində Azərbaycanın mövqeyini dəstəkləyir.
"Biz bir çox regional və beynəlxalq məsələlərdə ümumi fikir mübadiləsi aparırıq, bir-birimizi müxtəlif beynəlxalq təşkilatlarda dəstəkləyirik", - Abdullayev bildirib.
Onun sözlərinə görə, 2017-ci ildə 35,000 Səudiyyə vətəndaşı Azərbaycana səfər edib və bu, Fars körfəzi ölkələrinin əməkdaşlıq şurasına daxil olan dövlətlər arasında ən yüksək göstəricidir:
"Bu il Səudiyyə Ərəbistanından turist axını daha da artacaq, çünki Krallıqdan ölkəmizə daha çox insan səfər etməyə başlayıb. Viza rejiminin sadələşdirilməsi Səudiyyə vətəndaşlarının Azərbaycana səfərlərini asanlaşdırıb. Səudiyyə Ərəbistanı ilə Azərbaycan arasındakı əlaqə Riyad, Ciddə, Dəmmam və Qassimdən birbaşa uçuşların həyata keçirilməsi ilə daha da yaxşılaşıb".
Səfir əlavə edib ki, Azərbaycan qeyri-neft iqtisadiyyatının şaxələndirmək üçün səy göstərir və turizm sektoru bu məqsədə çatmaq istiqamətində perspektivli sektorlardan biridir: "Azərbaycanda turizm sürətlə inkişaf edir və xarici qonaqlar üçün hərtərəfli şərait yaradılıb".
Ş.Abdullayev Azərbaycanın məhsullarının Avropada tanındığını və bu məhsulların Krallığa ixracı üçün imkanların araşdırdığını vurğulayıb.
Səfir əlavə edib ki, Bakı müxtəlif sahələrdə Səudiyyə Ərəbistanı ilə əməkdaşlıq qurmaqda maraqlıdır, Səudiyyənin işgüzar dairələri müxtəlif imkanlar təklif edən xüsusi sənaye zonalarına baxa bilərlər.
Böyük İpək Yolu və Şimal-Cənub dəhlizini canlandırmaq üçün meqa layihələrdən danışan diplomat, Cənub-Şərqi Asiya və Cənub-Şərqi Avropanın kəsişməsində meydana çıxan yeni bir eksin mərkəzinin formalaşdığını söyləyib.
Onun sözlərinə görə, Azərbaycan Avropa dəmir yolu sisteminə inteqrasiya olunmuş və qısa müddətdə Asiya mallarının Avropaya çatmasına kömək edə biləcək dəmir yolu sistemini inkişaf etdirir.
P.Sultanova