Almaniya şokda: 1954-cü ildən bəri ilk dəfə qrupda qaldılar – FOTO
Məlum olduğu kimi, Rusiyada keçirilən DÇ-2018-də Almaniya yığması qrupun son oyununda Kazan şəhərində Cənubi Koreya millisi ilə qarşılaşıb.
Matç 0:2 hesabla koreyalıların qələbəsi ilə başa çatıb. Sin Thyo Yönün yetirmələri Yoahim Lövün çalışdırdığı komandanı məğlub etsə də, Cənubi Koreya 1/8 mərhələsinə çıxa bilməyib.
1news.az-ın Milli.az-a istinadən verdiyi xəbərə görə, Almaniya yığması isə tarixində ilk dəfə dünya çempionatında qrupdan çıxa bilməyib. 1954-cü ildən bəri “bundestim” həmişə mundiallara qatılıb və həmişə də qrupdan çıxıb. 16 mundial dalbadal!
Dünya çempionatlarında qrup mərhələsi ilk dəfə 1950-ci ildə tətdiq edilib, fəqət, Almaniya 2-ci Dünya Savaşına görə cəzalandığı üçün həmin çempionata buraxılmamışdı.
Almaniya yığması üçün DÇ-2018 ən pis çempionat oldu. 1954-cü ildən bəri "bundestim" 4 dəfə dünya çempionu olub, 4 dəfə 2-ci yeri tutub, 4 dəfə 1/2 finala çıxıb, 4 dəfə isə 1/4 finalda mübarizəni dayandırıb.
Statistikaya görə, Cənubi Koreya yığmasına qarşı almanlar supermatç oynadılar. Onlar 24 dəfə topu qapıya vurdular, oyun vaxtının 74 faizində topa nəzarət etdilər, ötürmələrdə də dəqiqlik 90 faiz oldu. Lakin almanlar koreyalılara qol vura bilmədilər və uduzdular.
May ayında Yoahim Löv Almaniya Futbol Federasiyası ilə müqaviləsinin vaxtını 2022-ci ilədək artırıb.
Lövün baş məşqçi olduğu dönəmdə Almaniya yığması 164 matç oynayıb, 109 oyunda qalib gəlib. "Bundestim" DÇ-2014-də və 2017-ci ilin Konfederasiyalar Kubokunda qalib gəlib, EURO-2008-də gümüş, DÇ-2010-da, EURO-2012-də və EURO-2016-da bürünc medallar qazanıb.
1news.az
