Azərbaycanın rəqs qrupu Şeyx Zayed İrsi Festivalında böyük marağa səbəb olub - FOTO
Birləşmiş Ərəb Əmirliklərinin (BƏƏ) Abu Dabi şəhərində iki ay boyunca keçirilən Şeyx Zayed İrsi Beynəlxalq festivalında iştirak çərçivəsində Azərbaycan mədəniyyət xadimləri proqramla çıxış ediblər.
1news.az-a ölkəmizin BƏƏ-dəki səfirliyindən verilən məlumata görə, festivalın mədəni hissəsində Azərbaycandan dəvət olunmuş Səma rəqs qrupu mərkəzi səhnədə Odlar Yurdu rəqs kompozisiyasını ifa edib.
Elşən Sadıxovun rəhbərlik etdiyi rəqs qrupunun milli musiqimizin sədaları altında çıxışı Abu Dabi dövlət televiziyası tərəfindən canlı yayımlanıb.
Daha sonra milli rəqs qrupumuz proqramlarını Azərbaycan pavilyonu qarşısında quraşdırılmış səhnədə davam etdiriblər. Rəqslər tədbir iştirakçılarının böyük marağına səbəb olub, qonaqlar milli paltarda olan rəqs ifaçıları ilə şəkillər çəkdiriblər. Rəqslərin 26 yanvar tarixinədək davamlı olaraq hər gün təşkili planlaşdırılır.
Tədbir çərçivəsində təşkil edilmiş paradda Azərbaycan pavilyonu iştirakçıları milli paltarlarda Azərbaycanın dövlət bayrağını bütün festival ərazisində gəzdirib, ziyarətçilərlə şəkillər çəkdirib, Azərbaycan barədə geniş məlumat veriblər.
Qeyd olunmalıdır ki, ənənəvi olaraq dekabr-yanvar aylarında keçirilən Şeyx Zayed İrsi Festivalını hər il iki milyondan çox ziyarətçi və bir çox dünya ölkələrinin dövlət və hökumət başçıları, yüksək vəzifəli rəsmiləri, ictimai, siyasi, mədəniyyət və incəsənət xadimləri, jurnalistlər və blogerlər ziyarət edir.
Festivalda yaradılmış Azərbaycan pavilyonunda müxtəlif milli paltarlarımız, Azərbaycan xalça muzeyində saxlanılan xalçaların prototipləri yer alıb.
Pavilyonda, həmçinin Azərbaycan istehsalı olan çaylar, ərzaq məhsulları, quru meyvələr və çərəzlər, turizm xidmətlərinin satışı həyata keçirilir, ölkəmizin turizm imkanları, mədəni, tarixi və memarlıq abidələrinin tanıdılması istiqamətində təbliğat işləri aparılır.
1news.az
