Bakı Ali Neft Məktəbində “Nəsimi” filmi nümayiş edildi – FOTO
Bakı Ali Neft Məktəbinin (BANM) möhtəşəm Konqres zalında Azərbaycan kino salnaməsində özünəməxsus yer tutan “Nəsimi” filminin 45 illiyi münasibəti ilə filmin özü nümayiş olunub.
1news.az-ın dövlət başçısının rəsmi saytına istinadla verdiyi xəbərə görə, Azərbaycan xalqının görkəmli şair və filosofu, hürufi təriqətinin nəğməkarı, insan zəkasının, istedadının və hisslərinin gözəlliyinin tərənnümçüsü İmadəddin Nəsiminin anadan olmasının 600 illiyinə həsr olunmuş bu film Azərbaycanın görkəmli rejissoru Həsən Seyidbəylinin rəhbərliyi altında çəkilmişdir.
Ali Məktəbdə ilk dəfə nümayiş etdirilən filmi BANM-ın tələbə və professor-müəllim heyətilə yanaşı rektor Elmar Qasımov, Azərbaycan Respublikasının Xalq artisti, “Şərəf” və "Şöhrət" ordenli görkəmli Azərbaycan aktyoru Rasim Balayev, C.Cabbarlı adına Azərbaycanfilm kinostudiyasının direktoru Müşfiq Hətəmov, Azərbaycanın xalq artisti, kinorejissor və ssenarist Əbdül Mahmudov və filmdə “Fatma” obrazını canlandıran Azərbaycan Respublikasının əməkdar artisti Xalidə Quliyeva izləyiblər.
Yazıçı İsa Hüseynovun "Məhşər" romanı əsasında çəkilən filmdə baş rolu aktyor Rasim Balayev oynayıb. Bu rol o zaman 25 yaşında olan aktyorun ilk işi olub.
S.Xankişiyeva
