İlham Əliyev sosial şəbəkələrdə ən populyar liderlərdən biridir
Twiplomacy saytı dünya liderlərinin sosial şəbəkələrdə aktivliyi ilə bağlı illik hesabat dərc edib.
1news.az-ın Twiplomacy saytına istinadla verdiyi xəbərə görə, hesabata əsasən Azərbaycan Prezidenti İlham Əliyev Instagram sosial şəbəkəsində abunəçilərinin sayına görə postsovet məkanının ən populyar liderlər arasında yer alıb.
Hesabatda göstərilir ki, postsovet məkanında ilk beşliyə daxil olan liderlərdən Rusiyanın Baş naziri Dmitri Medvedevin 2,91 milyon, Özbəkistan Prezidenti Şavkat Mirziyoyevin 831,7 min, Azərbaycan Prezidenti İlham Əliyevin 236,7 min, Ukrayna Prezidenti Petro Poroşenkonun 123,6 min, Qazaxıstanın Baş naziri Bakıtjan Saqintayevin isə 77,9 min abunəçisi var.
Dünya reytinqində Hindistanın Baş naziri Narendra Modinin 15 milyona yaxın, İndoneziya Prezidenti Coko Vidodonun 12 milyondan çox və ABŞ Prezidenti Donald Trampın 10 milyondan artıq abunəçisi qeydə alınıb.
Türkiyə Prezidenti Rəcəb Tayyib Ərdoğan 4,35 milyon abunəçi ilə ilk onluqda (6-cı yer) yer alıb.
Araşdırmaya əsasən, son bir il ərzində Azərbaycan Prezidentinin hesabında 142 yazı (139-u foto, 3-ü isə video ilə) yerləşdirilib. Ümumilikdə isə bu postları 1,038 milyon nəfər bəyənib və 2859 şərh yazılıb. Akkauntun auditoriyası son 1 il ərzində 65 420 nəfər artaraq 236 749 abunəçiyə çatıb.
S.Xankişiyeva