İtaliyanın “Scenari Internazionali” jurnalında Bakının Expo 2025 sərgisinə namizədliyi ilə bağlı məqalə dərc olunub
İtaliyanın “Scenari Internazionali” jurnalı Azərbaycanın İtaliyadakı səfiri Məmməd Əhmədzadənin Bakının “Expo 2025” Ümumdünya Sərgisinə ev sahibliyinə namizədliyi barədə “Xəzər dənizinin xəzinəsi olan Bakının namizədliyi” sərlövhəli məqaləsini dərc edib.
1news.az-a Səfirlikdən verilən xəbərə görə, məqaləsində M.Əhmədzadə ölkəmizin son illərdə çoxsaylı beynəlxalq mötəbər tədbirlərə ev sahibliyi etməkdə qazandığı və onların yüksək səviyyədə təşkilində sübuta yetirdiyi təcrübəsindən bəhs edir və Bakıda Expo sərgisinin təşkilinin bu təcrübənin məntiqi davamı olacağını qeyd edir.
Diplomat Bakının namizədliyinin irəli sürməsi istiqamətində görülən işlər və atılacaq addımlar barədə məlumat verərək Azərbaycanın “Expo 2025” sərgisi üçün “İnsan kapitalını inkişaf etdirək, daha yaxşı gələcək quraq” mövzusunun universal və aktual bir mövzu olaraq ölkəmizin uzunmüddətli milli inkişaf strategiyasına və BMT-nin Dayanıqlı İnkişaf Məqsədlərinə uyğunluq təşkil etdiyini vurğulayır.
M.Əhmədzadə ölkəmizin əsrlər boyu mədəniyyətlərin və sivilizasiyaların kəsişməsində yerləşdiyini, Şərq ilə Qərb, Şimal ilə Cənub arasında siyasi, ticarət və mədəni körpü rolunu oynadığını, dövlət müstəqilliyimizin bərpa olunmasından sonra ölkəmizin keçdiyi yol, inkişaf strategiyası, sosial-iqtisadi inkişafı, yoxsulluq və işsizliyə qarşı mübarizə, təhsilin inkişafı üzrə həyata keçirilmiş tədbirlər və onların nəticələri barədə də danışır.
Diplomat məqaləsində, eləcə də Azərbaycan-İtaliya əlaqələrinə də toxunaraq, bu əlaqələrin strateji tərəfdaşlıq xarakterinə malik olduğu, bunun Azərbaycan Respublikası Prezidenti İlham Əliyevin 2014-cü ildə İtaliyaya rəsmi səfəri vaxtı qəbul olunmuş Birgə Bəyanatda təsbit olunduğu, iki ölkə arasında davamlı olaraq yüksək səviyyəli siyasi dialoqun mövcud olduğu, bu xüsusda cari il ərzində İtaliya Prezidenti Sercio Mattarella və Senatının Sədri Maria Elisabetta Alberti Kasellatinin ölkəmizə, Azərbaycan Respublikasının Birinci vitse-prezidenti Mehriban Əliyevanın İtaliyaya rəsmi səfərlərinin həyata keçirildiyi, iqtisadiyyat və mədəniyyət sahəsində geniş əməkdaşlıqdan da bəhs edir.
Azərbaycanın 2015-ci ildə Expo Milan sərgisində uğurlu iştirakını da diqqətə çatdıran M.Əhmədzadə orada Azərbaycan pavilyonunun böyük rəğbət qazandığını, həmin pavilyonun qısa müddət öncə Bakı bulvarında qurulduğu, eləcə də “Expo 2025 Bakı” sərgisi üçün nəzərdə tutulan ərazinin xüsusiyyətləri barədə də danışır.
Məqalə ilə aşağıdakı keçiddən tanış olmaq mümkündür:
S.Xankişiyeva
