Məhluqə Rəhimova yenidən ƏQC-nin sədri seçildi
Dekabrın 11-də Azərbaycan Əlil Qadınlar Cəmiyyətinin (ƏQC) 2013- 2018-ci illər üzrə hesabat-seçki konfransı keçirilib.
ƏQC-nin mətbuat xidmətindən 1news.az-a verilən məlumatına görə, konfransda dövlət qurumlarının nümayəndələri, beynəlxalq və respublika səviyyəli ekspertlər, KİV təmsilçiləri və QHT rəhbərləri iştirak ediblər.
Konfransın açılışında Azərbaycan Respublikası dövlət himni səsləndirilib, Azərbaycanın ümumilli lideri Heydər Əliyevin anım günü və şəhidlərimiz bir dəqiqəlik sükutla hörmət və ehtiramla yad edilib.
ƏQC-nin İdarə Heyətinin sədri Məhluqə Rəhimova 2013- 2018-ci illər üzrə görülən işlər haqqında məruzə ilə çıxış edib. Bildirib ki, “Əlil Qadınlar” Cəmiyyəti əlilliyi olan insanların cəmiyyətə fəal inteqrasiyası istiqamətində fəaliyyət göstərir:
“Cəmiyyət əsasən əlil qadınların sosial problemlərinin həlli, hüquqlarının müdafiəsi və məşğulluğunun təmin edilməsi sahəsində yüksək səviyyədə ixtisaslaşdığı üçün ötən dövr ərzində yüzlərlə ölkə və beynəlxalq səviyyəli sosial layihələrdə yaxından iştirak edib. ƏQC Əmək və Əhalinin Sosial Müdafiəsi Nazirliyi tərəfindən AR Nazirlər Kabinetinin 2012-ci il 25 aprel tarixli 89 nömrəli qərarına uyğun olaraq məişət zorakılığından zərər çəkmiş şəxslərə xidmət göstərilməsi üçün 24 aprel 2014-cü il tarixdə akkreditasiya olunub”.
Eyni zamanda M.Rəhimovanın ətraflı məruzəsi ilə bərabər slayd və video görüntülərlə ƏQC-nin fəaliyyəti əyani olaraq konfrans iştirakçılarına təqdim olunub.
Konfransda ƏQC-nin yeni tərkibdə İdarə Heyətinin və Təftiş Komissiyasının üzvləri seçilib. ƏQC-nin nizamnaməsinə əlavə və dəyişikliklərlə təqdim olunan layihə qəbul olunub.
Konfransda səs çoxluğu ilə Məhluqə Rəhimova ƏQC-nin sədri seçilib.
1news.az
