Meksika və Azərbaycan kino sahəsində əməkdaşlığı müzakirə ediblər
Mədəni sahədə, ələlxüsus, kinematoqrafiya sahəsində əlaqələri inkişaf etdirmək üçün Meksikanın Azərbaycandakı səfiri Rodriqo Labardini Azərbaycan Kinematoqrafçılar İttifaqının sədri Şəfiqə Məmmədova və Dövlət Film Fondunun direktoru Rasim Salmanov ilə görüşlər keçirib.
1news.az-a Meksika səfirliyindən verilən məlumata görə, görüşlərdə ikitərəfli münasibətlərdən danışılaraq, mədəni sahədəki əlaqələrin dinamikası müsbət qiymətləndirilib.
Azərbaycan tərəfi milli kinonun tarixi, eyni zamanda kinomatoqrafiya ilə bağlı müəssisələrin fəaliyyəti haqqında bir sıra məlumatlar təqdim edib.
Səfir Labardini rəhbərlik etdiyi diplomatik nümayəndəlik tərəfindən kino sahəsində həyata keçirilən tədbirlər barədə məlumat verərək, Bakıda baş tutan Meksika Kinosu Festivalını vurğulayıb. Bu tədbirlər zamanı yerli publikanın Meksika mədəniyyətinə olan xüsusi marağını qeyd edib. Bundan əlavə, Meksika kinosunun inkişafı, onun qızıl və intibah dövrləri, xüsusi ilə illər boyu Meksika kinematoqrafiyasının dünya səviyyəsində tanıdılması haqqında məlumatı təqdim edib. Bu xüsusda, qeyd edib ki, son illərdə bir çox Meksika kino xadimləri Oskar mükafatına layiq görülüb: Alexandro Gonzalez İnyarritu, Emmanuel Lubezki, Alfonso Kuaron, Qiyermo del Toro və digərləri.
Tərəflər Meksika kinosunun Azərbaycanda daha çox təşviq olunması imkanlarını müzakirə edərək, həm ölkə paytaxtında, həm də regionlarda müvafiq festival və tədbirlərin həyata keçirilməsinin vacibliyini vurğulayıblar.
1news.az
