Məmməd-Quliyev Norveç səfirliyinin bağlanması barədə: Qollarından tutub saxlamayacağıq ki...
Əgər Norveç hökuməti Azərbaycanda səfirliyinin olmasını istəmirsə, qoy olmasın. Biz onları məcbur edə bilmərik ki, oturun burda.
Bu barədə 1news.az-a xarici işlər nazirinin müavini Mahmud Məmməd-Quliyev Norveçin Bakıdakı səfirliyini bağlamasına dair qərarını şərh edərkən bildirib. O deyib: “Bu, həmin ölkənin öz qərarıdır və Avropa İttifaqı ilə heç bir əlaqəsi yoxdur. Əgər Norveç hökuməti hesab edirsə ki, Azərbaycanda səfirlik lazım deyil, qoy bağlasınlar”.
Nazir müavini deyib ki, “Əsrin müqaviləsi”nin ilk illərində Norveç Azərbaycandan xeyli gəlir əldə edib:
“Sadəcə indi istəmirlər, onları qollarından tutub saxlamayacağıq ki... O qədər şirkətkər var ki, istəyirlər gəlib Azərbaycanda bu sahədə çalışsınlar”.
M.Məmməd-Quliyev deyib ki, bu qərar Azərbaycanın Avropa ilə münasibətlərinə heç bir təsir göstərməyəcək:
“Bu gün Azərbaycanın Avropa İttifaqı ilə münasibətləri çox yaxşı səviyyədədir, iqtisadi, energetika, nəqliyyat sahələrində əlaqələrimiz var.
Gələn ilin əvvəlində nəqliyyat üzrə ilk dialoq aparılacaq. Çünki Aİ nəqliyyat sahəsində Azərbaycanla əməkdaşlıqda çox maraqlıdır. Onların hazırda Çinlə bir razılaşmaları var ki, məhsulları Çinə qədər getsin. Bu məsələdə Aİ üçün Trans-Xəzər nəqliyyat sistemi olduqca faydalıdır. Çünki həm ucuzdur, həm də məsafə çox azdır.
Bir var ki, şimal, yaxud cənub istiqamətindən istifadə edəsən, bunun üçün aylar tələb olunur. Amma Azərbaycanla bu, daha əlverişlidir. Belə məsələlər var və Aİ-də bütün bunları çox yaxşı başa düşürlər”.
P.Sultanova
