Paşinyan Davos görüşü barədə: İlham Əliyevlə razılığa gəldik ki...
Davosda Azərbaycan Prezidenti İlham Əliyevlə görüş rəsmi danışıqlar prosesinin başlanğıcı hesab edilə bilməz.
1news.az xəbər verir ki, bu barədə Ermənistanın baş naziri Nikol Paşinyan Facebook üzərindən canlı yayım zamanı deyib.
O bildirib ki, Davosdakı görüş üçüncü idi. Sankt-Peterburq və Düşənbədə keçirilən görüşlər kimi Davos görüşü də da əvvəlcədən planlaşdırılmamışdı:
“Bizim iştirak etdiyimiz tədbirlər olur, lakin əvvəlcədən müzakirə edilmədiyi üçün ünsiyyət qurmadığımız vəziyyətlər yaranır. Bu görüşdə isə eyni yerdə olduğumuz vaxt ən azından görüşlərdən yayınmayacağımıza dair razılığa gəldik ", - deyə Paşinyan bildirib.
Onun sözlərinə görə, daha çox danışıqlar prosesinin tarixi müzakirə olunub:
"Nizamlanma üçün hansı şərtlərin, imkanların olduğunu, nəyin mümkünlüyünü və qeyri-mümkünlüyünü müzakirə edirik. Konkret detallar müzakirə edilmir, bir-birimizin fikirləri ilə tanış olduq.
Biz ictimaiyyətdə bəyan etdiklərimizi müzakirə edirik. Heç bir məxfilik yoxdur. Bu, absurddur ".
P.Sultanova
