1news.az

“Sabah”ın baş məşqçisi “Dostluq üçün futbol” layihəsində iştirak edəcək U-12 komandası işə görüşüb – FOTO

26 Aprel saat 16:30 ~ 5 dəqiqəlik oxu 321
“Sabah”ın baş məşqçisi “Dostluq üçün futbol” layihəsində iştirak edəcək U-12 komandası işə görüşüb – FOTO

“Sabah” futbol klubunun baş məşqçisi Elşad Əhmədov, kapitanı Cavid İmamverdiyev, yarımmüdafiəçisi Rəşad Eyubov “Dostluq üçün futbol” (Football for friendship) sosial layihəsində iştirak edəcək təmsilçilərimiz, həmçinin U-12 komandamızın heyəti ilə görüşərək, onlara öz məsləhətlərini veriblər.

1news.az-ın klubun saytına istinadla verdiyi xəbərə görə, “Əlincə Arena”da keçirilən görüşdə əvvəlcə 2017 və 2018-ci illərdə keçirilən turnirdən görüntülər və məşhur rusiyalı keçmiş futbolçu Aleksey Smertinin “Dostluq üçün futbol” sosial layihəsinin iştirakçılarına müraciəti yer alan videolar nümayiş etdirilib.

2017-ci ildə keçirilən turniri çempion kimi başa vuran komandanın heyətində yer almış təmsilçimiz Rəvan Kazımov builki yarış iştirakçılarına uğurlar arzulayıb.

Daha sonra isə baş məşqçimiz Elşad Əhmədov, kapitanımız Cavid İmamverdiyev, həmçinin yarımmüdafiəçimiz Rəşad Eyubov həm sosial layihənin iştirakçılarına, həm də U-12 komandasının üzvlərinə tövsiyələr veriblər.

Əhmədov azyaşlı futbolçularımıza müraciətində onlara intizamlı olmağı tövsiyə edib:

“Adından da göründüyü kimi bu layihədə əsas olan dostluqdur. Bu səfərləri hazırlayan insanlara çox sağ ol deyirik. Bu, azyaşlı futbolçular üçün vacibdir. Belə səfərlərdə yeni şeylər görüb öyrənirsiz. Lakin sizin işiniz futbol oynamaqla yekunlaşmır. Siz dərslərinizə də ciddi yanaşmalısız. İntizamlı olmalısız. Məşqçiniz Samir müəllim futbolçu olduğu zaman nümunəvi davranışı, intizamı ilə fərqlənirdi. Sizin əsas məqsədiniz gələcəkdə yaxşı, intizamlı futbolçu olmaqdan əlavə, ən əsası, ölkəmizə layiqli övlad kimi yetişmək olmalıdır. Bu gün sizin əyləşdiyiniz bu konfrans zalında bizim əsas komandanın futbolçuları otururlar. Məsələn, qapıçının oturduğu yerdə əsas komandanın qapıçısı Saşa Stamenkoviç əyləşir. Gələcəkdə onları siz əvəz edəcəksiz. Bu gün Cavid İmamverdiyev, Rəşad Eyubovun olduğu yerdə siz olacaqsız. Bu yolda hamınıza uğurlar”.

Kapitanımız Cavid İmamverdiyev də azyaşlı futbolçularımıza müraciət edib:

 “Siz bizim gələcəyimizsiz. Sevinirəm ki, sizə Samir müəllim kimi insan məşqçilik edir. Onunla uzun müddətdi tanışıq. Futbol oynadığı dövrdə də nizam-intizamı ilə diqqət çəkirdi. Düşünürəm ki, baş məşqçi kimi bir az da özünü inkişaf etdirib. Mənim sizə əsas məsləhətim odu ki, futbolçu olmaq yoluna çıxmısızsa, bu yolu sevərək gedin. Futbolçu olmaq istəyirsizsə, buna özününüzü – evdə, məktəbdə, çöldə hər yerdə hazırlamalısız. Futbolçu olmaq təkcə futbolkanı geyinib, meydana çıxıb futbol oynamaqdan ibarət deyil. Bunun üçün meydandan kənarda da çalışmalı, təkcə məşqlərdə yox, məktəbdə, evdə də nümunəvi davranışınızla seçilməlisiz”.

Komandamızın yarımmüdafiəçisi Rəşad Eyubov da öz tövsiyələrini azyaşlı futbolçularımıza çatdırıb:

 “İlk növbədə gələcək karyeranızda, qarşıdakı oyunlarınızda hər birinizə uğurlar arzulayıram. Bilməlisiz ki, yaxşı futbolçu olmaq üçün yalnız məşqlərə ciddi yanaşmaq kifayət deyil. Futbolla yaşamalısız. Bundan əlavə, məşqçilərinizin, valideynlərinizin sözlərinə əməl etməlisiz. Hər birinizə bir daha uğurlar”.

U-12 komandamızın baş məşqçisi Samir Əbdürəhmanov sonda baş məşqçiyə və futboçulara dəstəyə görə təşəkkür edib:

“Başda Elşad müəllim olmaqla, hər birinizə təşəkkür edirəm. Bu gün sizin bura gəlməyiniz bizim üçün böyük motivasiyadır. Biz də “Sabah”ın hər oyununda tribunadan dəstək oluruq, bundan sonra da olacağıq. Bizim uşaqların əsas məqsədi gələcəkdə əsas komandada oynamaqdır. Bu gün “Sabah”a tribunadan dəstək verən bu uşaqlar bəlkə də, bir neçə il sonra yaşıl meydanda komandanın uğurları üçün çalışacaqlar.

Mayın 2-də Xorvatiyada keçiriləcək turnirdə iştirak edəcəyik. Çalışacağıq ki, bu beynəlxalq turnirdə “Sabah”ı layiqincə təmsil edək. Sizinlə görüş bu turniröncəsi bizə yaxşı motivasiya olacaq. Bir daha hər birinizə təşəkkür edirik”.

Daha sonra “Dostluq üçün futbol”un iştirakçıları sosial layihənin simvollarından olan qolbağı Elşad Əhmədov, Cavid İmamverdiyev və Rəşad Eyubovun qoluna bağlayıblar.

Qeyd edək ki, “Dostluq üçün futbol” beynəlxalq uşaq sosial proqramı 2013-cü ildən keçirilir. Layihə dünyanın müxtəlif millətləri, müxtəlif yaşlarında və müxtəlif fiziki imkanlarında olan gəncləri birləşdirir. Layihənin məqsədi – uşaq futbolunu inkişaf etdirərək uşaqlarda digər xalqlar və mədəniyyətlərə etiram və tolerantlığı tərbiyə etməkdir. İştirakçıların dəstəkləyib irəliyə apardığı əsas dəyərlər – dostluq, bərabərlik, ədalət, sağlamlıq, sülh, sədaqət, qələbə, ənənələr və şərəfdir.

Layihə çərçivəsində Dostluq və Futbol Beynəlxalq Gününə həsr olunmuş tədbirlər də keçiriləcək. Sülh, dostluq, bərabərlik və sağlam həyat tərzini təbliğ edən bu cür aksiyalar Avropa, Asiya, Afrika, Şimali və Cənubi Amerikada da keçirilir. Minlərlə uşaq və yeniyetmələr yoldaşlıq oyunlarında, açıq məşqlərdə, fleşmob, telemarafon və idman bayramlarında iştirak edir. İştirakçıları bütün dünyadan məşhur furbolçular, məşqçilər, aparıcı və artistlər dəstəkləyir.

Xatırladaq ki, 2017-ci ildə Azərbaycanı təmsil edən Rəvan Kazımov turnirin qaliblərindən biri olub. Layihənin son mərhələsi isə İspaniyanın paytaxtı Madriddə baş tutacaq.

“Sabah” FK “Dostluq üçün futbol” sosial layihəsinin iştirakçısı olacaq

Azərbaycanı Madriddə təmsil edəcək futbolçuların adları açıqlanıb

Azərbaycanlı uşaqlar “Dostluq üçün futbol” beynəlxalq sosial proqramında təmsil olunacaq

MFL “Dostluq üçün futbol” layihəsində ustad dərsləri keçəcək – FOTO

“Dostluq üçün futbol” turnirində azərbaycanlı nümayəndə qapıçı kimi çıxış edəcək – FOTO – VİDEO

Azərbaycanlı məşhur modelyer “Dostluq üçün futbol” layihəsini dəstəklədi – FOTO

S.Xankişiyeva

 

 

OXUCULARIN SEÇİMİ
REDAKSİYANIN SEÇİMİ
Azərbaycan futbolu BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net