Səfir : Azərbaycanla əməkdaşlığın inkişafı üçün əzmlə işləmək niyyətindəyik
Bakıda Misirin milli bayramı - İyul İnqilabının 66-cı ildönümü münasibətilə rəsmi qəbul təşkil edib.
1news.az xəbər verir ki, tədbirdə əvvəlcə Azərbaycanın və Misirin dövlət himnləri səsləndirilib.
Misirin Azərbaycandakı fövqəladə və səlahiyyətli səfiri Adel İbrahim Ahmed İbrahim inqilabdan ötən illərdə ölkəsinin keçdiyi inkişaf yolundan danışıb.
Misir ilə Azərbaycan arasındakı əlaqələrdən söz açan səfir bildirib ki, ölkələrimiz arasında tarixən səmimi əlaqələr mövcud olub. Misir Azərbaycanın müstəqilliyini tanıyan ilk ölkələrdəndir. Səfirin sözlərinə görə, Misir və Azərbaycan inkişaf edən ölkələrdir və Azərbaycanla əməkdaşlığın inkişafı üçün əzmlə işləmək niyyətindədir.
Diplomat əlavə edib ki, hər iki ölkə iqtisadi inkişafa və sosial tərəqqiyə nail olmaq istiqamətində bir-birinin səylərini dəstəkləyir.
Səfir Prezident İlham Əliyevin rəhbərliyi ilə Azərbaycanın inkişafı istiqamətində əldə edilmiş nailiyyətləri xüsusi qeyd edib. Diplomat Azərbaycanda müxtəlif dinlərin və təriqətlərin birgə sülh şəraitində yaşamasının təqdirəlayiq olduğunu vurğulayıb.
Milli Məclisin sədr müavini Bahar Muradova Misir xalqını və dövlətini dövlətini Azərbaycan hökuməti adından təbrik edib.
O, Misirin beynəlxalq müstəvidə layiqli yerinin olduğunu bildirib.
İkitərəfli əlaqələrdən danışan Bahar Muradova Azərbaycan-Misir münasibətlərinin qarşılıqlı hörmətə əsaslandığını söyləyib. Səfirliklərin ikitərəfli istiqamətdə gördüyü işlərin təqdirəlayiq olduğunu deyib.
Bahar Muradova Azərbaycan Prezidenti İlham Əliyevin 2007-ci ildə Misirə səfərinin ikitərəfli əlaqələrin daha da genişləndirilməsi üçün mühüm rol oynadığını bildirib. Əlavə edib ki, iki ölkə arasında iqtisadiyyat, energetika, turizm və digər sahələrdə əlaqələrin genişləndirilməsi üçün potensial imkanlar mövcuddur. Azərbaycanın Misirlə iqtisadi və ticarət əlaqələrinin daha da gücləndirilməsinə xüsusi önəm verdiyini deyən parlamentin sədr müavini inandığını bildirib ki, bu əməkdaşlıq gələcəkdə daha da dərinləşəcək.
Tədbirdə rəsmi şəxslər, deputatlar, diplomatik korpusun nümayəndələri, media təmsilçiləri, ictimaiyyətin nümayəndələri iştirak ediblər.
P.Sultanova
