Səfir: Belçika Azərbaycan- Avropa İttifaqı danışıqlarını tam dəstəkləyir
Bakıda Belçikanın milli bayramı - müstəqilliyinin 188-ci, kral Filipin taxt-taca çıxmasının 5-ci ildönümü ilə əlaqədar rəsmi qəbul təşkil edilib.
1news.az xəbər verir ki, tədbirdə hökumət rəsmiləri, millət vəkilləri, xarici ölkələrin Azərbaycandakı səfirləri, ictimaiyyət nümayəndələri iştirak ediblər.
Azərbaycan və Belçikanın dövlət himnləri səsləndirildikdə sonra çıxış edən Belçikanın ölkəmizdəki səfiri Bert Skufs deyib ki, 2018-ci il Azərbaycan və Belçika üçün əlamətdar olub. Bu il Azərbaycan Xalq Cümhuriyyətinin yaradılmasının 100-cü ildönümü qeyd edilib. Azərbaycanla Belçika arasında siyasi məsləhətləşmələr keçirilib.
O, Belçikanın 2019-2020-ci illər üçün BMT Təhlükəsizlik Şurasının qeyri-daimi üzv seçilməsində Azərbaycanın göstərdiyi dəstəyi vurğulayıb. Ölkəsinin altıncı dəfədir ki, bu təşkilata üzv seçildiyini əlavə edib.
Səfir Ai ilə əməkdaşlığa da toxunub və qeyd edib ki, Belçika Azərbaycanla Aİ arasında davam edən hərtərəfli saziş üzrə danışıqları tam dəstəkləyir.
Xarici işlər nazirinin müavini Mahmud Məmməd-Quliyev Azərbaycan hökuməti və xalqı adından Belçika xalqını təbrik edib. Bildirib ki, iki ölkə arasında əlaqələr inkişaf edir, ikitərəfli əlaqələrin gündəliyi çox genişdir:
“Bu xüsusda energetika və nəqliyyat sahəsində geniş əməkdaşlığın potensialını vurğulamaq istərdim. Azərbaycanın fəal təşəbbüskarı və iştirakçısı olduğu beynəlxalq layihələrdə, eləcə də ölkəmizdə həyata keçirilən proqramlarda Belçika şirkətləri yaxından iştirak edir. Bunlardan güünəş enerjisi mərkəzlərini göstərmək olar. Azərbaycan Belçikanın kənd təsərüfatı, o cümlədən heyvandarlıq və qida sahəsində əldə etdiyi təcrübədən bəhrələnməkdə maraqlıdır”.
Pərvanə Sultanova