Səfir: İsveçrə ilə Azərbaycan arasında geniş əlaqələr mövcuddur - FOTO
Bakıda İsveçrənin Milli Günü və Azərbaycanla İsveçrə arasında ikitərəfli texniki əmkdaşlığın 20-ci il dönümü münasibətilə rəsmi qəbul keçirilib.
1news.az xəbər verir ki, qəbulda hökumət rəsmiləri, millət vəkilləri, səfirlər, ictimaiyyət nümayəndələri iştirak ediblər.
İsveçrənin Azərbaycana yeni təyin olunmuş səfiri Muriel Peneveyre bildirib ki, iki ölkə arasında zəngin və geniş əməkdaşlıq əlaqələri mövcuddur.
Xanım səfir deyib ki, ölkələrimiz arasında əməkdaşlıq durmadan genişlənir. Hazırda İsveçrə ilə Azərbaycan arasında siyasi, iqtisadi və mədəni sahələrdə dostluq əlaqələri mövcuddur.
Azərbaycanın Xarici İşlər Nazirliyinin xüsusi tapşırıqlar üzrə səfiri Gündüz Cəfərov çıxışında deyib ki, ölkələrimiz arasında mövcud olan siyasi dialoq münasibətlərin inkişafını sürətləndirir:
“Azərbaycan və İsveçrə arasında əlaqələr yüksələn xətt üzrə inkişaf edir. Dövlət başçıları, parlament rəhbərləri və nazirliklər arasında müntəzəm görüşlər keçirilir. Hazırda Azərbaycanla İsveçrə arasında iqtisadi-ticarət əlaqələri də yüksək vəziyyətdədir və daha da inkişaf etməsi üçün yaxşı perspektivi var. Azərbaycan və İsveçrə arasında münasibətlər mədəni, humanitar və digər sahələrdə də inkişaf edir. Əminəm ki, mövcud olan əlaqələr hər iki xalqın rifahına yardım edəcək”.
P.Sultanova