Novruz Məmmədov: “Aparıcı ölkələr beynəlxalq hüquq haqqında onlara sərfəli olan zaman xatırlayırlar”
“Dünyada münaqişələrin artmasının səbəbi beynəlxalq ictimaiyyətin biganəliyidir və onlar dünyanın müxtəlif ölkələrində baş verən münaqişələri həll etmək istəmirlər”.
1news.az-ın verdiyi məlumatına görə, bu sözləri Bakıda BMT-nin Sivilizasiyalar Alyansının VII Qlobal Forumu çərçivəsində “Sülhün bərqərar edilməsi və terrorun aradan qaldırılması” mövzusunda keçirilən bölmə iclasın zamanı Prezident Administrasiyası rəhbərinin müavini, PA-nın Xarici əlaqələr şöbəsinin müdiri Novruz Məmmədov deyib:
“Düşünməliyik ki, bu münaqişələr hansı səbəblərdən baş verir. Əgər biz bunu anlamasaq, uğur qazana bilmərik. Biz, SSSR-nin süqutundan və Varşava müqaviləsindən nə əldə etdiyimizi analiz etməliyik. O zamanlar 10 ölkə problemdən əziyyət çəkirdisə, bu gün 50 ölkə əziyyət çəkir. Biz, bu vəziyyətə nə səbəb olduğunu düşünməliyik”.
220 gənc qızın “Boko Haram” terror təşkilatı tərəfindən girov götürülməsini misal gətirən N.Məmmədov qeyd edib ki, nədənsə iki il ərzində heç kəs bu münasibətlə heç bir reaksiya göstərmədi, BMT nəsə edə bilərdi və bundan sonra dünya ictimaiyyəti də fəal fəaliyyətə keçə bilərdi.
“Biz 25 ildir ki, münaqişə şarəitindəyik. Tutaq ki, Dağlıq Qarabağ mübahisəli bölgədir. Bəs Dağlıq Qarabağın ətrafında 7 işğal altında olan rayonlar? Bu barədə heç kim danışmır. Dünya ictimaiyyəti deyir ki, danışıqlar aparın. Dağlıq Qarabağ probleminin diqqət etdikdə burada heç kəs beynəlxalq hüquqa əməl etmir. Bizə deyirlər ki, “gedin özünüz danışın!”, axı bu, qəbuledilməzdir. Mənə elə gəlir ki, dünyada baş verən bütün problemlərin kökü bu cür laqeyd münasibətlərdən irəli gəlir”, - N.Məmmədov bildirib.
O, təəssüflə qeyd etdi ki, aparıcı ölkələr dünyanın müxtəlif ölkələrində baş verən hadisələrə müxtəlif cür reaksiya göstərirlər və bu barədə onlar beynəlxalq hüquqa deyil, şəxsi maraqlardan çıxış edirlər:
“Ölkəm üçün beynəlxalq hüquq – vacibdir və ədadləti bildirir. Lakin burada vasitəçilər ədalət və ya beyəlxalq hüquq əsasında münaqişəni həll etməyi bildirmirlər. Liviya hadisəsi zamanı BMT-nin qərarı dərhal yerinə yetirildi, Azərbaycana gəlincə isə 4 qətnamə hələ də yerinə yetirilməyib. Yəni aparıcı ölkələrın marağına uyğun gəlirsə qətnamə və beynəlxalq hüquq yerinə yetirilir, ölkəmə gəlincə isə - yox. Bu, nə mənim, nə də ki, sizin ölkələr üçün yaxşı hal deyil. Lakin biz ədalət istəyirik, bu isə baş vermir. Ona görə ki, bunu aparıcı ölkələr istəmir”.
1news.az
