Millət vəkili: Konstitusiyada ediləcək dəyişiklik vətəndaşlıq məsələsi ilə bağlı çaşqınlığı aradan götürəcək
Millət vəkili Vüsal Hüseynov növbəti dəfə şəxsi Facebook səhifəsində Konstitusiyada dəyişikliklər edilməsi haqqında Referendum Aktı layihəsində yer alan maddələrlə bağlı fikirlərini bölüşüb.
1news.az xəbər verir ki, millət vəkilinin yazdığına görə, Konstitusiyanın vətəndaşlıq hüquqnun təminatı ilə bağlı 53-cü maddəsinə təklif edilən dəyişiklikdə müəyyən edilir ki, Azərbaycan Respublikası vətəndaşlığından məhrum edilmə ilə bağlı yer alan “heç bir halda” tələbi Konstitusiyadan çıxarılsın və qanunla müəyyən edilmiş itirilmə halları istisna kimi əlavə edilsin:
“Konstitusiyanın mətnində mövcud “heç bir halda” ifadəsi müxtəlif vaxtlarda, xüsusilə Azərbaycan Respublikasının vətəndaşlığı haqqında Qanuna edilən əlavə və dəyişiklər zamanı müzakirələrə səbəb olub və bəzi hallarda ictimaiyətdə çaşqınlıq yaradıb. Buna səbəb qanunvericiliyimizdə yer alan “vətəndaşlıqdan məhrumetmə”və “itirilmə” anlayışları arasındakı fərqə diqqət yetirilməməsi və ya qismən bununla bağlı qeyri-müəyyənliklə bağlı olub.
Belə ki, Azərbaycan Respublikasının vətəndaşlığı haqqında Qanunda artıq “Vətəndaşsızlığın ixtisar edilməsi haqqında” 1961-ci il 30 avqust tarixli Konvensiyanın müddəaları nəzərə alınmaqla vətəndaşlığın itirilməsi üçün əsaslar müəyyən edilib”.
Dediklərinə nümunə gətirən V.Hüseynovun sözlərinə görə, Qanuna əsasən, Azərbaycan vətəndaşının digər ölkənin vətəndaşlığını könüllü əldə etməsi və ya xarici dövlətin silahlı qüvvələrində və ya digər silahlı birləşmələrində könüllü xidmət etmək belə hallar üçün əsas hesab edilir. Bu halda vətəndaşlığın itirilməsi Qanunda müəyyən edilmiş şərtlər nəzərə alınmaqla məhkəmə tərəfindən həll edilir. Belə istisnalar beynəlxalq tələblərə uyğundur.
“Konstitusiyaya təklif edilən dəyişikliklər vətəndaşlığa xitam verilməsi üçün heç bir yeni əsaslar və hüquqi çərçivə özündə daşımır, tam tərsi, bu istiqamətdə tamlığı təmin edəcək və çaşqınlığı aradan götürəcək”- deyə, millət vəkili qeyd edib.
Mövzu ilə əlaqədar:
Vüsal Hüseynov “Meydan TV”-yə cavab verdi
1news.az
