Azərbaycan XİN: İstanbulda törədilmiş terror aktında iki Azərbaycan vətəndaşı yaralanıb

Azərbaycanın Xarici İşlər Nazirliyi yanvarın 1-də İstanbulda törədilən terror aktı ilə əlaqədar açıqlama yayıb.

1news.az-a nazirliyin mətbuat xidmətindən verilən məlumata görə, açıqlamada İstanbulda gecə klublarından birində törədilən və çoxlu sayda insanın ölümünə və yaralanmasına səbəb olan qanlı terror aktı qəti şəkildə pislənib. “Bu xain terror aktı nəticəsində həyatını itirmiş şəxslərin ailələrinə və qardaş Türkiyə xalqına dərin hüznlə başsağlığı verir, kədərini bölüşür və yaralananların tezliklə şəfa tapmasını diləyirik. Xain və alçaq terror əməllərini törədənlər heç zaman qardaş Türkiyənin terrorizmə qarşı mübarizədə əzm və qətiyyətini sarsıda bilməzlər. Biz, qardaş Türkiyə ilə həmrəyliyimizi bir daha vurğulayırıq”, - deyə açıqlamada qeyd olunub.

Bildirilib ki, son məlumata görə, yaralananlar arasında Azərbaycanın iki vətəndaşı da müəyyən edilib. Azərbaycanın İstanbuldakı baş konsulluğu məsələ ilə əlaqədar Türkiyənin müvafiq dövlət orqanları və vətəndaşlarımızla davamlı təmasdadır. Əlavə məlumat olduqda ictimaiyyətə bildiriləcək.

Qeyd edək ki, bu gecə yerli vaxtla saat 01.15 (Bakı vaxtı ilə 02.15) radələrində Santa Klaus geyimli naməlum silahlı İstanbuldakı “Reina” gecə klubuna yaxınlaşaraq, girişdə duran polis əməkdaşını və mülki şəxsi qətlə yetirib, sonra isə içəri daxil olaraq oradakı insanlara atəş açıb. Hücum zamanı gecə klubunda Yeni il bayramını qeyd edən 600-dək insan olub. Nəticədə 39 nəfər ölüb, 69 nəfər isə yaralı var.

1news.az