“Qızıl top”un sahibi məlum oldu

Dekabrın 4-də Parisdə “Qızıl top” mükafatının təqdim edilməsi mərasimi keçirilib.

1news.az-ın məlumatına görə, mərasimdə FIFA və “France Football” jurnalı 2018-ci ilin ən yaxşı futbolçusuna verilən “Qızıl top” mükafatının sahibinin adını açıqlayıb.

Gözlənildiyi kimi “İlin ən yaxşı futbolçusu” adına Xorvatiya millisinin və İspaniyanın "Real Madrid" klubunun futbolçusu Luka Modriç layiq görülüb. O, səsvermə nəticəsində “Atletiko Madrid” klubunun hücumçusu Antuan Qrizmanı, “Çelsi” komandasının əsas qol silahı sayılan Edən Hazardı və Kriştiano Ronaldonu (“Real Madrid”- “Yuventus”) qabaqlayıb.

Mərasimdə, həmçinin FIFA tərəfindən bu il ilk dəfə olaraq ən yaxşı gənc (20 yaşa qədər) və qadın futbolçuya da mükafatlar təqdim edilib. Ən gənc kişi futbolçusu nominasiyasında qalib Fransanın PSJ komandasının hücumçusu Kilyan Mbappe olub. Ən yaxşı qadın futbolçu adına isə Fransanın “Lion” klubunun hücumçusu Ada Heqerberq layiq görülüb.

Qeyd edək ki, “Qızıl Top” “France Football” həftəlik dərgisinin baş redaktoru olan Qabriel Anonun təşkil etdiyi illik mükafatdır. Mükafat 1956-cı ildən futbol yazarlarının fikrinə əsasən ən yaxşı oyunçuya təqdim olunur. Mükafatın ilk qalibi 1956-cı ildə ingiltərəli hücumçu Stenli Metyuz olub. 

Kriştiano Ronaldo və Lionel Messi mükafatı ən çox qazanan futbolçulardır. Onlar hərəyə beş dəfə “Qızıl top”a sahib olublar.

1news.az