Ramin Məmmədov: Azərbaycanda heç kimin fəaliyyətinə, qeyri-qanuni addımlarına, fərdi statusuna görə qiymət verilmir
“Azərbaycan hüquqi dövlətdir və qanun qarşısında hamı bərabərdir. Sosial statusu, tutduğu vəzifə, göstərdiyi xidmətlər heç kimə qanunun tələblərindən yan keçmək imtiyazı vermir”.
1news.az-ın verdiyi xəbərə görə, bunu Milli Məclisin deputatı Ramin Məmmədov avqustun 18-də Azərbaycan Milli Elmlər Akademiyasının hazırkı rəhbəri Ramiz Mehdiyevin kürəkəni, sabiq deputat İlham Əliyevin karantin qaydalarını pozaraq qızına toy etməsi ilə bağlı məsələyə öz fikirlərini bildirib.
O, qeyd edib ki, Azərbaycan prezidenti dəfələrlə öz çıxışlarında qanunun tələblərinə hər kəsin əməl etməsinin zəruriliyini vurğulayıb. Qanun qarşısında bərabərlik dövlətdə davamlı sabitliyin, cəmiyyətin bütün təbəqələrindən olan vətəndaşların maraq və mənafelərini müdafiə etməyə qadir mükəmməl idarəçilik mexanizminin yaradılmasının fundamental prinsiplərindən biridir.
“Bu gün Azərbaycan dövləti elə bir inkişaf səviyyəsinə çatıb ki, qanundan yan keçmək, gizlənmək, digər vətəndaşlarla müqayisədə daha böyük üstünlüklər əldə etmək mümkün deyil. Çünki qanunlar və onların icrasına məsul dövlət qurumlarının kifayət qədər dəqiq, operativ işləyən nəzarət mexanizmləri var. Üstəlik ictimai nəzarətin də bu məsələdə rolu zaman keçdikcə artır. Ona görə də hər birimiz atdığımız addımları daha dərindən ölçüb-biçməli, dövlətimizin qanunlarına hörmət nümayiş etdirməliyik”.
Deputat bildirib ki, Azərbaycanda heç kimin fəaliyyətinə, qeyri-qanuni addımlarına fərdi statusuna görə qiymət verilmir. “Qanunları pozan hər kəsi qanun cəzalandırır. Yəni hansısa vəzifəli şəxsin yol verdiyi pozuntulara onun sosial statusuna görə qiymət verilməməlidir. Bu, məsələnin yalnız mənəvi-psixoloji tərəfi kimi qiymətləndirilə bilər. Sadə vətəndaş qanun qarşısında hansı məsuliyyət daşıyırsa, vəzifəli şəxsin də hüquqi məsuliyyəti eynidir, ona hansısa əlavə üstünlüklər, yaxud imtiyazlar tanınmır. Çünki hüququn başlıca prinsipi ədalətdir, hüquq insanlara deyil, konkret əməllərə qiymət verir”.
Ramin Məmmədov hesab edir ki, son hadisələr (yəni Azərbaycan Milli Elmlər Akademiyasının hazırkı rəhbəri Ramiz Mehdiyevin kürəkəni, sabiq deputat İlham Əliyevin karantin qaydalarını pozaraq qızına toy etməsi və buna görə də Abşeron Rayon Məhkəməsinin 22 avqust tarixli qərarı ilə həbs edilməsi) bir daha qanunlara əməl etməyin vacibliyinə dair cəmiyyətə ünvanlanmış mesaj kimi dəyərləndirilməlidir. Bu mesajdan isə hər kəs nəticə çıxarmalıdır. “Qanunlar vətəndaşların mənafelərini qorumaq üçün qəbul olunur. İndiki situasiyada COVİD-19 pandemiyası ilə bağlı karantin rejiminin tətbiqindən irəli gələn müəyyən qadağalar, məhdudiyyətlər var. Hansı ki, vətəndaşların, o cümlədən bu qanunu pozan şəxslərin də sağlamlığını qorumağa xidmət edir. Yəni onlara qarşı tətbiq olunan cəzalar həm də onların öz mənafelərini qoruyur.
Millət vəkili bütün vətəndaşları qanunların tələblərinə, Nazirlər Kabineti yanında Operativ Qərargahın tövsiyələrinə riayət etməyə çağırıb.
Qeyd edək ki, Abşeron Rayon Məhkəməsinin 22 avqust tarixli qərarı ilə karantin qaydalarını pozaraq qızına toy təşkil edən – Azərbaycan Milli Elmlər Akademiyasının (AMEA) prezidenti, akademik Ramiz Mehdiyevin kürəkəni - sabiq millət vəkili İlham Əliyev həbs edildi. Hakim Şövkət Nəcəfovanın sədrliyi ilə keçirilən iclasda o, Azərbaycan Respublikası İnzibati Xətalar Məcəlləsinin 211.1-ci maddəsi ilə təqsirli bilinərək 15 sutka həbs edildi. Bundan əlavə, toyun digər təşkilatçısı, keçmiş deputat İlham Əliyevin qudası Rövşən Mustafayev də 15 sutka inzibati qaydada həbs edildi.
Mövzu ilə əlaqədar oxuyun:
Prezident İlham Əliyev Ramiz Mehdiyevə “dərs verdi” – VİDEO
Məzahir Əfəndiyev: Azərbaycan cəmiyyətində toxunulmaz şəxs yoxdur
Adil Əliyev: Bəzi səlahiyyətli şəxslər karantin qaydalarını bilərəkdən pozur
Ramiz Mehdiyevin kürəkəni 15 sutka həbs edildi – FOTO – VİDEO
Karantində toyda iştirak etdiyi üçün Siyavuş Novruzova töhmət verilib
Sabiq deputatın toy edən qudası 15 sutka həbs edildi
Karantində özünə ad günü edən müğənni cərimələndi
S.Xankişiyeva
