“The Guardian”: Eldar Mahmudovun ailəsi İngiltərədə 100 milyonluq biznesə sahibdir
Azərbaycanın keçmiş milli təhlükəsizlik naziri Eldar Mahmudovun övladları İngiltərədə lüks daşınmaz əmlaka, o cümlədən Londonun ən məşhur mağazası olan Harrods yaxınlığında 17 milyon funt-sterlinqlik evə sahibdirlər.
İngiltərənin “The Guardian” qəzeti yazır ki, belə məlumatlar istintaq nəticəsində məlum olub.
2015-ci ildə Prezidentin imzaladığı sərəncamla Eldar Mahmudov Azərbaycanın milli təhlükəsizlik naziri vəzifəsindən uzaqlaşdırıldı.
Keçən ilin noyabr ayında Cayman National Bank-ın (bundan sonra - CNBIOM) məlumat bazasının sındırılması nəticəsində Eldar Mahmudovun ailəsinin Men adasında (Britaniyada tax-tac ərazisi) təxminən 100 milyon avro dəyərində biznes-əmlak imperiyası yaratdığı ortaya çıxıb.
Demək olar ki, aktivlərinin hamısı Mahmudovun oğlu – 36 yaşlı Anar, həmçinin 31 yaşlı qızı Nərgizlə əlaqəli şirkətlər hesabına əldə edilib.
Sənədlərdən aydın olur ki, 2016-cı ilin iyun ayında bankdakı tənzimləmə qaydalarına cavab verən menecer, Britannia Group Ltd ilə əlaqəli "əlaqəli təşkilatlar" şəbəkəsi haqqında daxili istifadə üçün qeydlər edib. Onların hamısı Eldar Mahmudovun şirkətləri idi.
"Əməliyyatlara baxmadan da bu hesabla bağlı ciddi narahatlığım var”, - həmin vaxt menecer yazıb.
Növbəti ay, bank adanın maliyyə kəşfiyyat qrupuna müştəri məlumatlarını açıqlayır. Bildirilir ki, 2014-cü ilin oktyabrından 2015-ci ilin iyulunadək Anar Mahmudov Britannia Group Ltd-nin hesablarına ümumilikdə 14 milyon funt-sterlinq depozit qoyub.
Bir neçə təşkilatın jurnalistləri - Organized Crime and Corruption Reporting Project, Finance Uncovered and Transparency International - tərəfindən aparılan birgə araşdırma göstərir ki, Eldar Mahmudovun övladlarının "əlaqəli şirkətlər" vasitəsi ilə əldə etdikləri obyektlərin arasında İngiltərənin sahil kurort şəhərlərində - Pul və Bornmutda ümumi dəyəri 13,5 milyon funt-sterlinq olan iki ofis binası var.
"The Guardian"ın yazdığına görə, istintaq, həmçinin Anar Mahmudovun 17,35 milyon funt-sterlinq dəyərində, Londonun Naytsbric ərazisindəki Pont küçəsindəki dördmərtəbəli binaya sahib olduğu ortaya çıxıb.
Məlumdur ki, Anar Mahmudovun qayınanası – Zamirə Hacıyeva Harrods mağazasında 16 milyon funt-sterlinqdən çox pul xərcləyib və onun həyat yoldaşı, Azərbaycan Beynəlxalq Bankının keçmiş sədri Cahangir Hacıyev 2015-ci ildə dövlət əmlakını mənimsəmə ittihamı ilə həbs olunub və hazırda həbsdədir.
Cahangir Hacıyev həbsxanaya göndərildikdən və Eldar Mahmudov vəzifəsindən uzaqlaşdırıldıqdan sonra CNBIOM Bank sonuncularla əlaqəli olan bütün hesabları bağlayıb.
"İndi tam şəffaflığı təmin etmək və bütün bu vəsaitlərin mənbəyini araşdırmaq vacibdir”, deyə Transparency International-ın İngiltərə filialında siyasət üzrə direktoru Dunkan Heym bildirib.
Fotoda: Eldar Mahmudovun oğlu və qızı, 2013-cü il.
Anar və Nərgiz Mahmudovların vəkilləri Finance Uncovered nəşrinə verdiyi müsahibədə, ailənin maddi qaynaqlarının mənbəyini XIX əsrdə varlanmış əcdadları Aslan Aşurovdan gəldiyini qeyd ediblər. Vəkillərin sözlərinə görə, Eldar Mahmudovun oğlu və qızının əmlakları müvafiq qaydada qeydiyyata alınıb və Anar Mahmudov uğurlu iş adamıdır.
“The Guardian” yazır ki, məlumatların sızması nəticəsində Anar Mahmudovun gəlirlərinin mənşəyi bibisi – Bakıda tikinti şirkəti quran Elmira Mahmudovadan keçməsini izah edən məktub da var.
İstintaq müəyyən edib ki, Mahmudovlar ailəsi Mallorka, Lüksemburq və Litvadakı əmlak və şirkətlərə də sahibdirlər.
CNBIOM Bank verdiyi açıqlamada "çirkli pulların yuyulması ilə əlaqədar öhdəliklərini bildiyini... və şübhəli əməliyyatlar və cinayət araşdırmaları ilə əlaqədar səlahiyyətlilərlə hər zaman tam əməkdaşlıq etdiyini” bildirilib.
Eldar Mahmudovun vəkili isə jurnalistlərlə ünsiyyət saxlamır.
Tərcümə: S.Xankişiyeva
