Aydın Hüseynov: Yeni sosial paket vətəndaşlara verilən dəyərin göstəricisidir
Prezident İlham Əliyevin iyunun 18-də imzaladığı yeni sosial paket Azərbaycanda həyata keçirilən sosial islahatların növbəti inqilabi mərhələsi olmaqla yanaşı, dövlət başçısının vətəndaşlarımıza göstərdiyi diqqət və qayğının, verdiyi böyük dəyərin göstəricisidr.
Bunu 1news.az-a iqtisadçı millət vəkili Aydın Hüseynov yeni sosial paketin əhəmiyyəti barədə danışarkən deyib.
O bildirib ki, bu il ərzində Prezident tərəfindən xalqın rifahının yüksəldilməsi istiqamətində olduqca mühüm addımlar atılıb. Dövlət başçısı bu islahatların davamlı olacağını bəyan edirdi və iyunun 18-də daha bir inqilabi addım atıldı.
Millət vəkilinin sözlərinə görə, minimum aylıq əməkhaqqının 180 manatdan 250 manata qaldırılması, o cümlədən dövlət qulluqçularının, müəllimlərin, hüquq-mühafizə orqanlarının əməkdaşlarının əməkhaqlarının əhəmiyyətli dərəcədə artırılması Azərbaycan vətəndaşlarının sosial rifahının yaxşılaşmasına böyük töhfə verəcək:
“Bu, birbaşa dövlət sektoru ilə yanaşı, özəl sektorda da çalışan xeyli insanı əhatə edir, onların maddi rifahının yaxşılaşdırılmasını səciyyələndirir.
Bütövlükdə biz görürük ki, Prezident İlham Əliyev tərəfindən həyata keçirilən siyasət vətəndaşların maraqlarının ifadəsinə yönəlib. İqtisadiyyat inkişaf etdikcə, dövlət büdcəsinin gəlirləri artdıqca bu, birinci növbədə insanlarımızın rifahının yaxşılaşdırılmasına istiqamətlənir”.
A.Hüseynov ölkədə inflyasiya, bahalaşma olacağına dair sosial şəbəkələrdə yayılmış bəzi məlumatlara da toxunub. Millət vəkili deyib ki, əməkhaqlarının artırılmasını dövlət büdcəsi hesabına həyata keçirilir, ölkədə inflyasiyanı, bahalaşmanı doğuracaq heç bir iqtisadi əsas yoxdur:
“Bu kimi hallardan sui-istifadə etmək yolverilməzdir. Ciddi iqtisadi amil yoxdursa, qiymət artımından söhbət gedə bilməz. Bir daha qeyd edirəm ki, bunun üçün hər hansı iqtisadi əsas yoxdur”.
1news.az