Azərbaycan Ordusunun şəhid hərbçisi Dmitri Sonsevlə vida mərasimi keçirilir - FOTO
İşğal olunmuş torpaqlarımızın azadlığı uğrunda döyüşlərdə şəhid olmuş hərbi qulluqçumuz Dmitri Solntsevlə vida mərasimi keçirilir.
1news.az-ın Trend-ə istinadən verdiyi xəbərə görə, Bakının Nəsimi rayonunda, Dmitri Solntsevin yaşadığı binanın önündə təşkil olunan vida mərasimində dövlət qurumlarının rəsmiləri, Milli Məclisin deputatları, ictimaiyyət nümayəndələri və sıravi insanlar iştirak edir.
Mərasimdə çıxış edən Nəsimi rayon İcra Hakimiyyətinin başçısı Asif Əsgərov bildirib ki, bu gün şəhidlərimiz torpaqlarımızın azad olunması üçün canlarından keçib:
"Biz haqq yolundayıq. 30 il qabaq ermənilər torpaqlarımızı işğal edib,1 milyondan artıq vətəndaşımız evindən didərgin düşüb. Azərbaycan torpaqlarının işğaldan azad olunması ilə bağlı beynəlxalq qurumların qətnamələri olsa da, ermənilər bu qətnamələrə məhəl qoymadılar. Erməni terrorçuları öz çirkin niyyətlərindən əl çəkmədilər. Onlar Azərbaycan xalqına qarşı soyqırımlar törətdilər. Azərbaycan dövləti dəfələrlə torpaqların sülh yolu ilə işğaldan azad olunması ilə bağlı danışıqlara getsə də, Ermənistan bu danışıqlardan yayındı, Azərbaycan torpaqlarında vəhşiliklər törətdilər".
1news.az