1news.az

Azərbaycanın və Monteneqronun Baş nazirlərinin görüşü olub

24 İyun saat 15:05 ~ 2 dəqiqəlik oxu 220
Azərbaycanın və Monteneqronun Baş nazirlərinin görüşü olub

Azərbaycan Respublikasının Baş naziri Novruz Məmmədovun iyunun 24-də Monteneqronun Baş naziri Duşko Markoviç ilə görüşü olub.

1news.az-ın AZƏRTAC-a istinadla verdiyi xəbərə görə, əvvəlcə Azərbaycanın və Monteneqronun Baş nazirlərinin təkbətək görüşü keçirilib.

Sonra görüş nümayəndə heyətlərinin iştirakı ilə geniş tərkibdə davam etdirilib.

Baş Nazir Novruz Məmmədov Azərbaycan-Monteneqro dostluq əlaqələrindən danışaraq ölkələrimiz arasında çox yaxşı münasibətlərin qurulduğunu vurğulayıb. “Azərbaycan hər zaman Monteneqro ilə əlaqələrin inkişafına xüsusi önəm verir. Hesab edirəm ki, münasibətlərimizin inkişafında yüksək səviyyəli qarşılıqlı səfərlərin xüsusi rolu var. Əlbəttə, bu səfərlərin, aparılan danışıqların nəticəsidir ki, bu gün ölkələrimiz arasında iqtisadiyyatın müxtəlif istiqamətlərində, o cümlədən qarşılıqlı investisiyaların qoyuluşu sahəsində səmərəli əməkdaşlıq mövcuddur. Biz gələcəkdə bu əlaqələri daha da genişləndirməliyik. Sizin səfəriniz də bu münasibətlərin inkişafına öz müsbət töhfəsini verəcək”, - deyə Novruz Məmmədov vurğulayıb.

Azərbaycanın Dağlıq Qarabağ regionunun və onun ətrafında yerləşən 7 rayonun uzun illərdir erməni işğalı altında olduğunu bildirən Novruz Məmmədov qeyd edib ki, Ermənistan-Azərbaycan Dağlıq Qarabağ münaqişəsi BMT Təhlükəsizlik Şurasının qətnamələri, Helsinki Yekun Aktı əsasında, ölkəmizin ərazi bütövlüyü çərçivəsində həll olunmalıdır.

Ölkəmizə səfərindən məmnunluğunu bildirən Baş Nazir Duşko Markoviç Azərbaycan ilə Monteneqro arasında çox yaxşı münasibətlərin mövcud olduğunu vurğulayıb. “Monteneqro kiçik ölkədir. Bizim bir çox ölkələrlə dostluq əlaqələrimiz var. Bu münasibətlərin bəziləri, o cümlədən Azərbaycan ilə əlaqələr bizim üçün xüsusi əhəmiyyət daşıyır”,- deyə Duşko Markoviç vurğulayıb.

Görüşdə enerji, turizm, tikinti, nəqliyyat sahələrində əməkdaşlığın genişləndirilməsi imkanlarına və qarşılıqlı maraq doğuran digər məsələlərə dair fikir mübadiləsi aparılıb.

S.Xankişiyeva

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net