Deputat: “Azərbaycan generalları qəhrəmancasına döyüşür, erməni generallar isə bölgəyə gəlmir”

İyulun 13-dən 14-nə keçən gecə Azərbaycan-Ermənistan dövlət sərhədinin Tovuz rayonu istiqamətində şiddətli döyüşlər davam edib.  Bu gün səhər saatlarında döyüş zamanı general-mayor Polad Həşimov ön xətdə qəhrəmancasına şəhid olub. Onunla bir yerdə polkovnik İlqar Mirzəyev də şəhid olub.

Məsələ ilə bağlı 1news.az-a danışan Milli Məclisin deputatı Arzu Nağıyev deyib ki, bu gün Tovuzda çox ciddi mövqe döyüşləri gedir, artıq iriçaplı pulemyot deyil, artileriyadan istifadə edilir.

"Ermənilər çalışırlar ki, Azərbaycan vətəndaşları arasında panika yaratsınlar. Dünən gecədən başlayaraq intensiv atəşə məruz qoymuşdular və cavab atəşi ilə Azərbaycan Ordusu onları susdurub”.

Deputat bildirib ki, general Polad Həşimov ön cəbhədə əsgərlərlə birlikdə olur. 

“Ona görə də qəlpələrdən biri də məhz ona dəyib. Digər məsələ ola bilər ki, Polad Həşimov qəhrəman bir general olduğuna görə ermənilər onu izləməklə məşğul olurdular, koordinatlarını ermənilər çoxdan ələ keçirmək istəyirdilər, lakin buna nail ola bilmirdilər. Polad Həşimov  Aprel döyüşlərində də çox mühim qəhrəmanlıq göstərmişdi. Bu məsələlərdə Azərbaycan ordusunun generalı, müdafiə naziri, Ali baş komandanı və vətəndaşlar hamısı bir yerdədir”.

Arzu Nağıyevin sözlərinə görə, ermənilər son zamanlar sərhədə polisləri yerləşdirməyə başlamışdılar.

“Orduya çağırış və eyni zamanda onların generallarının başı korrupsiya məsələlərinə qarışıb. Ona görə də əsasən ön cəbhədə əsgərlər və bir sıra polis əməkdaşlarıdır. Onlar da çox zəifdilər, ona görə də düşürəm ki, generallar müxtəlif bəhanələr gətirməklə əsgəri ön cəhbəhə göndərib özləri gizlənməklə məşğuldular. Burada fərqə baxın, Azərbaycan generalları səngərdə əsgərlə bir yerdə döyüşür, onların generalları isə döyüş gedən bölgəyə gəlmirlər”.

Qafar Ağayev