Ermənistanda koronavirusdan 18 nəfər ölüb - Məlumatlar məhdudlaşdırılır
2020-ci ilin 16 aprel tarixinə olan məlumata əsasən Ermənistanda koronavirusa yoluxmuş insanların ümumi sayı 1159 nəfər təşkil etmişdir. Bu infeksiyaya görə Ermənistanda 18 nəfər artıq həyatını itirib.
1news.az xəbər verir ki, Paşinyan tərəfdarları COVID 19 infeksiyası ilə mübarizə sahəsində rəsmi səviyyədə həyata keçirilən tədbirləri yüksək qiymətləndirməyə çalışsalar də, ölkədə hökumətin bu istiqamətdə gördüyü işləri ciddi tənqid edən ictimaiyyət nümayəndələri də az deyil. Onların sözlərinə görə, əhalinin nisbətini, ölkəyə gələn xarici turistlərin sayını nəzərə aldıqda, koronavirusa yoluxanların sayına görə Ermənistanın Cənubi Qafqazda mənfi mənada lider ölkəyə çevrildiyini demək olar və vəziyyətin belə inkişaf etməsində məhz Paşinyan hökumətinin də böyük rolu olub.
Tənqidçilər vurğulayırlar ki, Paşinyan hökuməti ilk günlərdən bu sahədə fəaliyyətsizlik nümayiş etdirərək xəstəliyin qarşısının alınması mərhələsində məğlubiyyətə uğramış və faktiki koronavirusun ölkədə yayılmasını təşviq edən amillərdən biri olmuşdur. Belə ki, ölkədə koronavirus infeksiyana ilk yoluxma halı martın 1-də qeyd alınsa da, Paşinyan hökuməti əhalinin təmaslarını məhdudlaşdırmaq əvəzinə, hələ də 5 aprel tarixində nəzərdə tutulmuş konstitusiya referendumu ilə əlaqədar fəal təşviqat kampaniyasını aparırdı və vətəndaşların kütləvi toplaşmasına səbəb olurdu.
Bu xüsusda həmçinin 16 martdan etibarən ölkədə elan olunmuş fövqəladə vəziyyətin əsas məqsədinin koronavirusa qarşı mübarizə deyil, əksinə uğursuzluqlar fonunda informasiya axını vasitəsilə erməni ictimaiyyətini nəzarətə almaq və tənqidçiləri susdurmaq istəyi olduğu qeyd olunur. Hökumət tərəfindən qəbul edilmiş qərarlar sırasında ölkədə koronovirusla bağlı məlumat yayımı ilə bağlı məhdudiyyət, yəni “yalnız rəsmi məlumatların yayılması” qadağası və bununla əlaqədar yayılmış bir neçə məlumatların silinməsinə dair erməni KİV-lərə qarşı irəli sürülmüş tələblər həm yerli ictimaiyyətin, həm də beynəlxalq təşkilatların kəskin etirazı ilə üzləşmiş və nəticədə Paşinyan hökuməti koronovirusla bağlı rəsmi beynəlxalq mənbələrin məlumatlarının yayılmasına da icazə verməli olub.
Paşinyanın siyasi rəqibləri həmçinin hesab edirlər ki, hökumət ölkədə fövqəladə vəziyyət rejiminin həyata keçirilməsini təmin edə bilməmişdir. Onların qeydlərinə görə, insanların hərəkətlərinə məhdudiyyətlər haqqında qərar qəbul edilsə də küçələrdə çoxlu insanlar müşahidə olunurdu. Bu iradı şərh edən erməni polisinin rəhbərliyi hamını nəzarət etmək və küçələrə çıxmağa icazə verməmək üçün kifayət qədər polis gücünün olmadığını bildirmişdir.
Hökumət həmçinin koronavirusun iqtisadi fəsadları ilə mübarizə məqsədilə beynəlxalq maliyyə təşkilatlarından az həcmdə yardım cəlb edə bilməsində ittiham olunur. Məsələn aprelin əvvəlində Ermənistan koronovirusla mübarizə üçün 50 ədəd süni tənəffüs aparatlarının alınması üçün Dünya Bankından 3 milyon ABŞ dolları almışdır. Paşinyan hökumətinin əleyhdarlarının iradlarına görə, bu yardımın əhalinin sayına nisbəti götürdükdə faktiki olaraq hər bir erməni vətəndaşına 1 dollar yardım deməkdir.
Paşinyan əleyhdarları onun Ermənistanın bu böhrandan daha güclü çıxacağına dair bəyanatlarını qeyri-ciddi və əsassız sayırlar. Əksinə onların mülahizələrinə görə, ölkənin iqtisadi sisteminin zəif inkişaf etdiyini nəzərə alaraq yaxın zamanda Ermənistanın iqtisadi vəziyyət 2008-ci ildəki böhran zamanı olduğu durum kimi olacaqdır.
1news.az
