İsveçrədə Azərbaycan iqtisadiyyatına maraq artıb - FOTO
78 min şirkəti özündə birləşdirən İsveçrənin Kiçik və Orta Miqyaslı Müəssisələr Cəmiyyətinin mətbuat orqanı olan “Erfolg” (Müvəffəqiyyət) qəzeti son buraxılışında Azərbaycan iqtisadiyyatına geniş yer ayırıb.
1news.az-a ölkəmizin İsveçrədəki səfirliyindən verilən məlumata görə, cəmiyyətə üzv bütün şirkətlər arasında paylanılmaqla yanaşı, İsveçrənin siyasi və işgüzar dairələri tərəfindən də maraqla izlənilən bu qəzetin “Müsahibə” bölməsində adətən İsveçrə siyasətinin və biznes dünyasının tanınmış nümayəndələri ilə müsahibələr yer alır.
Qəzetin tarixində nadir hallardan biri kimi, “Müsahibə” bölməsinin bu dəfəki qonağı ölkəmizin İsveçrə Konfederasiyasındakı səfiri Xanım İbrahimova olub. Səfir Azərbaycan-İsveçrə münasibətlərindən danışaraq, son illər ərzində həyata keçirilmiş yüksək səviyyəli səfərlərin iki ölkə arasındakı əməkdaşlığın inkişafına böyük töhfə verdiyini bildirib. Cari ilin iyun ayında Bern şəhərində ticarət və iqtisadi əməkdaşlıq üzrə Birgə Komissiyanın növbəti iclasının keçiriiləcəyini qeyd edən səfir hazırda ikitərəfli münasibətlərdə iqtisadi əməkdaşlığın inkişafının əsas prioritet məsələlərdən biri olduğunu diqqətə çatdırıb. Səfir ölkəmizdə xarici investisiyalar üçün əlverişli şəraitin yaradıldığını, investorların hüquqlarının qorunması üçün lazımi iqtisadi islahatların aparıldığını və müvafiq qanunvericiliyin təkmilləşdirildiyini qeyd edib. Müsahibədə, həmçinin Azərbaycanın turizm imkanlarından geniş söz açılıb. 2018-ci ilin oktyabr ayından etibarən Bakı-Cenevrə-Bakı birbaşa reysinin açılmasının, viza rejiminin sadələşdirilməsinin və ölkəmizdə turizm sahəsində xidmətin keyfiyyətinin artmasının İsveçrədən ölkəmizə gələn turistlərin sayının çoxalmasında mühüm rol oynadığı qeyd edilib.
Son illərdə iki ölkənin iqtisadi yönümlü təşkilatları arasında əməkdaşlıq əlaqələri inkişaf edir. 2018-ci ilin oktyabr ayında İsveçrənin “Switzerland Tourism” təşkilatı və İsveçrə Turizm Bürosu arasında Əməkdaşlıq haqqında Memorandumu imzalanmışdır. Cari ilin iyun ayında isə Azərbaycan Kiçik və Orta Biznesin İnkişafı Agentliyi (KOBİA) ilə İsveçrənin Kiçik və Orta Miqyaslı Müəssisələr Cəmiyyəti, Azərbaycanda İxracın və İnvestisiyaların Təşviqi Fondu (AZPROMO) ilə Turqau Kantonunun Ticarət və Sənaye Palatası arasında Əməkdaşlıq haqqında Memorandumların imzalanması nəzərdə tutulur. Bu barədə razılıq, Səfirliyin İsveçrə kantonlarına həyata keçirdiyi işgüzar səfərlər zamanı əldə olunub.
Cari ilin iyun ayında Sürix şəhərində İsveçrə-MDB Birgə Ticarət Palatası ilə birgə biznes forumun təşkili də nəzərdə tutulan tədbirlər arasındadır. 2019-cu ilin oktyabr ayında isə, Qərbi İsveçrənin işgüzar dairələrindən ibarət nümayəndə heyətinin ölkəmizə səfərinin təşkili gözlənilir.
1news.az
