1news.az

Mübariz Əhmədoğlu: Ermənistan Təhlükəsizlik Xidməti rəhbərinin istefası çoxmənalıdır

23 Sentyabr saat 10:39 ~ 3 dəqiqəlik oxu 83
Mübariz Əhmədoğlu: Ermənistan Təhlükəsizlik Xidməti rəhbərinin istefası çoxmənalıdır

Ermənistan Təhlükəsizlik Xidmətinin keçmiş rəhbəri Artur Vanetsyanın ətrafında baş verənlər Ermənistanın müasir hakimiyyətinin daxilində baş verənlərin ən vacib göstəricilərindən biridir.

Vanetsyan mövzusu güman ki, uzun müddət müzakirə olunmayacaq; daha ciddi proseslər qarşıdadır. A.Vanetsyanın istefaya göndərilməsi isə bir sıra prizmalardan təhlil obyektidir:

1. A.Vanetsyan ailəsi ilə birlikdə Tbilisidə Gürcüstanın keçmiş Təhlükəsizlik Xidmətinin rəhbər,i indiki Daxili İşlər naziri V.Qomelauri ilə birlikdə şəkil qoymasının hər halda mənası simvolikdir; Ermənistandan kənarda özünü təhlükəsizlikdə olduğunu nümayiş etdirdi. Başqa sözlə, Ermənistanda onun üçün təhlükə var imiş. O, Ermənistanda əhaliyə və siyasətçilərə təhlükə yaradan quruma rəhbərlik edib, N.Paşinyanın kombinatorikalarının hazırlanmasında və reallaşmasında çox yaxından iştirak edib. Beləliklə Vanetsyanın davranışı N.Paşinyanın ruhi xəstə olması ilə bağlı yayılan məlumatların bir daha təsdiqidir.

2. A.Vanetsyan N.Paşinyanın hakimiyyətinin sona çatdığını və eləcə də özünün vəzifədən gedəcəyini düşünərək çox böyük ehtimalla iri korrupsiya əməliyyatlarından şəxsi gəlir əldə edib. MDB dövlətlərindən yalnız Ermənistan Milli Təhlükəsizlik Xidmətində korrupsiya ilə mübarizə ön planda idi və mətbuatın yazdığına görə keçmiş Maliyyə naziri Qrant Xaçatryandan müəyyən qədər pul alaraq onun azad olunacağını da vəd verib. Görünür Vanetsyan son dövrlərdə pul oyunlarına girişib və bu onun pul oyunları N.Paşinyanda şübhə yaradıb. Çünki N.Paşinyan və onun ailəsi hakimiyyətinin sonunun çatdığını düşünür və onların da puldan ehtiyacları yaranır. Beləliklə, pul bölgüsü üstündə Paşinyanla narazılıq Vanetsyanın istefasına səbəb oldu.

3. Rusiya Təhlükəsizlik  Şurasının sədri N.Patruşevin Yerevana səfərindən 2 gün qabaq A.Vanetsyanın məzuniyyətə çıxması ilə bağlı məlumat yayıldı. Məlumatda Vanetsyanın 10 gün sonra məzuniyyətə çıxacağı göstərilirdi. N.Patruşevin Yerevanda görüşdüyü şəxslərin sırasında A.Vanetsyan yox idi. A.Vanetsyan Ermənistanda təhlükəsizlik siyasətində birinci şəxsdir. Təhlükəsizlik Şurasının katibi A.Qriqoryan inamlı sorosçudur. N.Patruşevin A.Vanetsyana qarşı de-marşı təsadüfi ola bilməzdi. Ehtimal ki, Vanetsyan Rusiyanın qarşısında “günahkardır”. Günahını da güman etmək olar:  Gürcüstanda ABŞ Milli Demokratiya İnstitutunun keçirdiyi rəy sorğusunda bəlli oldu ki, Gürcüstandakı ermənilər bu ölkənin əsas inkişaf istiqamətinin-NATO-ya inteqrasiyanın əleyhinədirlər. Cavaxetiya ermənilərinin Gürcüstanın NATO əleyhinə olması siyasətinin ucu Ermənistana gedib çıxdı. O vaxt Gürcüstanın Təhlükəsizlik Xidmətinin rəhbəri Vaxtanq Qomelauri dərhal Yerevana gəldi. Görünür o zaman A.Vanetsyan  Cavaxetiya ermənilərinin içərisində Rusiyanın əsas adamlarının adlarını V.Qomelaruriyə verib. Yeri gəlmişkən məhz indi ona görə də çox böyük arxayınlıqla o, Gürcüstanda sığınacaq tapıb. Beləliklə, N.Patruşevin  Vanetsyana de-marşı sonradan özünün inkişafını tapıb və vəzifədən uzaqlaşdırıldı. N.Paşinyanın son dövrlərdə vəzifədən uzaqlaşdırdığı adamlar içərisində “qarşılıqlı razılaşma” yalnız N.Patruşevin səfərindən sonra istefaya göndərilənlərlə əlaqəli işlənilir. “Qarşılıqlı razılaşma” termini Vanetsyan üçün də tətbiq olundu.

Ermənistanın siyasi elitasının çürüdüyü və gələcəyə ümidsiz olduğu aşkarlandı. Ermənistan dövlətinin yeganə xilas yolu qonşulara qarşı normal siyasət aparmaqdan, işğalçılıqdan əl çəkməkdən keçir.

Mübariz Əhmədoğlu

Siyasi İnnovasiya və Texnologiyalar Mərkəzinin direktoru, politoloq 

 

 

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net