Sarkisyan aprel məğlubiyyəti ilə bağlı bu gün izahat verəcək
2016-cı il aprel döyüşlərində Ermənistanın məğlubiyyətini araşdırmaq məqsədilə yaradılmış parlament komissiyasının qapalı iclası keçirilib.
1news.az xəbər verir ki, bu barədə “Johovurd” nəşri yazıb.
Nəşrin məlumatına görə, toplantı dinləmə qurğuları olmayan xüsusi kabinetdə keçirilib. İclasdan əvvəl iştirakçıların məlumatları sızdırmalarının qarşısını almaq üçün telefonları alınıb. Lakin, “Johovurd” qapalı iclasdakı müzakirələrin bəzi detallarını əldə edə bilib.
Məlum olub ki, komissiya artıq Müdafiə Nazirliyinə parlamentdə hesabat verəcək şəxslərin siyahısını göndərib. Siyahıya Ermənistanın sabiq prezidenti Serj Sarkisyan da daxildir. Üçüncü prezident Serj Sarkisyan iyulun 10-da aprel döyüşləri barədə məlumat vermək üçün parlamentə dəvət olunacaq.
Dağlıq Qarabağdakı separatçı rejimin nümayəndələri də 2016-cı il hadisələri ilə əlaqədar məlumat vermək üçün parlamentə çağrılacaqlar.
Xatırladaq ki, bu il mayın 20-də baş nazir Nikol Paşinyan bəyan etmişdir ki, 2016-cı ilin aprel döyüşləri ilə bağlı bütün şərtləri araşdırmaq üçün parlament komissiyası yaradılacaq.
Parlamentin spikeri Ararat Mirzoyan isə mayın 31-də komissiyanın formalaşdırılmasını elan edib.
P.Sultanova
