“Yaşasın müstəqil Azərbaycan Respublikası və onun müdrik, qayğıkeş Prezidenti” – Minnətdarlıq məktubları
Prezident İlham Əliyevin dünyada tüğyan edən koronavirus pandemiyasının Azərbaycanda geniş yayılmasının qarşısının alınması, insanların sağlamlığının qorunması və rifahının yaxşılaşdırılması ilə bağlı verdiyi qərarlar vətəndaşlarımız tərəfindən böyük rəğbətlə qarşılanır.
Görülən işlər dövlətimizin başçısının xalqımıza diqqət və qayğısının bariz nümunəsi kimi qiymətləndirilir. Azərbaycan vətəndaşları bu diqqət və qayğıya görə Prezident İlham Əliyevə minnətdarlıqlarını ona ünvanladıqları çoxsaylı məktublarda ifadə edirlər.
Bu haqda 1news.az dövlət başçısının rəsmi saytına istinadla həmin məktubların bir qismini təqdim edir.
Faiq Şıxəlizadədən, Lənkəran, Azərbaycan
“Hörmətli cənab Prezident.
Sizin dünyanı ağuşuna almış bu pandemiya dönəmində göstərdiyiniz səyləri, vətəndaşlarımızın sağlamlığı, əhalinin sosial vəziyyətinin sabit saxlanılması istiqamətində atdığınız uğurlu addımları yüksək qiymətləndiririk. Karantin dövründə cəmiyyətin bütün sahələrinə, o cümlədən, təhsilin davam etdirilməsi, şagirdlərin və müəllimlərin tədris prosesindən kənarda qalmaması istiqamətində verdiyiniz tapşırıqlara və həyata keçirdiyiniz çevik fəaliyyətinizə görə bir vətəndaş və bir təhsil işçisi kimi Sizə dərin təşəkkürümü bildirirəm.
İnanırıq ki, xalqımız da pandemiya şəraitinin bütün qaydalarına əməl edəcək və biz dövlət olaraq bu ağır vəziyyətdən üzüağ çıxacağıq. Son dövrlərdə regionların sosial-iqtisadi inkişafı və korrupsiya ilə mübarizə sahəsində də görülən böyük işlərə görə Sizə dərin minnətdarlığımı bildirir və yorulmaz fəaliyyətlərinizdə yeni uğurlar arzulayıram”.
Könül Rəhimovadan, Salyan, Azərbaycan
“Əziz Prezidentimiz.
Mən Salyan şəhər Y.Qasımov adına 4 saylı tam orta məktəbin müəllimi Rəhimova Könül Sədafər qızı Sizə minnətdarlıq etməyi özümə borc bilirəm.
Siz Ulu Öndərimizin layiqli davamçısısınız. Müstəqil Azərbaycan Sizin apardığınız düzgün siyasətin nəticəsində gündən-günə inkişaf edir, çiçəklənir. Azərbaycanın hər bölgəsində quruculuq-abadlıq işləri aparılır, şəhərlərimiz, rayon və qəsəbələrimiz abadlaşır, gözəlləşir. Bu quruculuq-abadlıq işləri Salyanda da yüksək səviyyədə aparılır. Yeni məktəblər və uşaq bağçaları tikilir, təmirə ehtiyacı olanlar əsaslı təmir olunur.
Sizin Sərəncamınızla və Heydər Əliyev Fondunun dəstəyi ilə Ərəbqardaşbəyli, Qızılağac və Aşağı Kürkənd kəndlərində yeni məktəblərin, Qarabağlı kəndində yeni uşaq bağçasının tikintisi bizi çox sevindirir. Kənd və qəsəbələrin yollarının abadlaşdırılması istiqamətində tədbirlər davam etdirilir. Belə ki, hazırda Aşağı Kürkənd və Xurşud kənd yollarına asfalt örtüyü çəkilir. Bütün bunlar Salyan əhalisinin rahatlığının təmin olunmasına xidmət edir.
Cənab Prezident, bütün görülən işlərə, uğurlarımıza görə Sizə öz adımdan, ailəmin və valideynlərimin adından dərin minnətdarlığımı bildirirəm. Biz Sizinlə fəxr edirik. Fəxr edirik ki, Sizin kimi humanist, ədalətli və xalqını öz ailəsi kimi sevən Prezidentimiz var.
Hər zaman dualarımızdasınız. Allah Sizi və ailənizi qorusun”.
Zümrüd Qəhrəmanovadan, Gəncə, Azərbaycan
“Möhtərəm cənab Prezident.
Sizin rəhbərliyinizlə ölkəmiz gündən-günə gözəlləşir. Xüsusilə, Gəncəmiz gülüstana çevrilir. Sizin aqrar sahəyə göstərdiyiniz diqqət və qayğı sayəsində Azərbaycan Dövlət Aqrar Universiteti müasir dünya standartlarına cavab verən, aqrar mütəxəssislər yetişdirən elm ocağına çevrilib. Sizin və Birinci vitse-prezidentimiz Mehriban xanım Əliyevanın Azərbaycan Dövlət Aqrar Universitetinin yeni tədris korpusunun açılışında iştirakınız biz gəncəlilərə böyük qürur və fəxr hissi yaşatdı. Gəncə ziyalıları adından Sizə dərin minnətdarlığımı bildirirəm”.
Əliyulla Quliyevdən, Bakı, Azərbaycan
“Hörmətli cənab Prezident.
Mən bir vətəndaş olaraq bu gün Azərbaycanın gündən-günə çiçəklənməsinin şahidiyəm. Sizin xalqımızı düşünərək atdığınız addımları xalq görür və yüksək dəyərləndirir. Təəssüflər olsun ki, bütün dünyanı ağuşuna alan COVID-19 pandemiyası bizim ölkəmizdən də yan keçmədi. Bu bəladan xilas olmaq üçün vaxtında və düşünülmüş qərarlar qəbul edilmişdir və bu qərarlara hamımız ciddi yanaşmalıyıq. “Biz birlikdə güclüyük!” devizi altında COVID-19 pandemiyasına qarşı mübarizə aparsaq, inanıram ki, yenidən sağlam həyatımıza qayıdacağıq.
Onu da qeyd etmək istəyirəm ki, bu çətin zamanda Siz həmişəki kimi, xalqı düşündünüz və qayğı göstərdiniz. Bu diqqətə görə, bütün xalqımızın adından Sizə dərin təşəkkürümü bildirirəm. Allah Sizi, ailənizi və xalqımızı qorusun”.
Mazan Əzimovdan, Siyəzən, Azərbaycan
“Möhtərəm cənab Prezident.
Bu təşəkkür məktubunu Sizə Siyəzən şəhəri M.Ə.Sabir küçəsinin sakinləri adından yazıram. Ölkəmizdə koronavirusa qarşı mübarizə tədbirlərini alqışlayırıq. Azərbaycanın hər bir bölgəsində olduğu kimi, Siyəzən rayonunda da lazımi tədbirlər həyata keçirilir. Pandemiya dövründə aztəminatlı ailələrə, yaşı 65-dan yuxarı olan şəxslərə, işə getmək imkanı olmayanlara dövlət tərəfindən maddi və mənəvi dəstək göstərilməsi, ərzaq yardımları verilməsi təqdirəlayiqdir. Həmçinin, çox yaxşı haldır ki, belə bir dövrdə sosial və infrastruktur layihələrinin icrası davam etdirilir.
Bunun üçün öz adımdan, ailəmin və rayon sakinlərinin adından Sizə minnətdarlığımı bildirirəm. Yaşasın müstəqil Azərbaycan Respublikası və onun müdrik, qayğıkeş Prezidenti”.
Fariz Bünyatovdan, Ağcabədi, Azərbaycan
“Möhtərəm cənab Prezident.
Bütün dünyada ciddi həyəcan yaradan, insanların həyatına son qoyan koronavirus pandemiyası adlı bəlaya qarşı ölkəmizdə bütün imkanlardan istifadə olunmaqdadır. Sizin bilavasitə rəhbərliyinizlə respublikamızda vətəndaşların sağlamlığının qorunması üçün aparılan əvəzolunmaz tədbirləri çox yüksək qiymətləndiririk. Qısa zamanda yeni xəstəxanaların istifadəyə verilməsi, mövcud xəstəxanaların uyğunlaşdırılması, qoruyucu vasitələrin istehsalı, xəstələrin müalicəsi üçün tibb ocaqlarının lazımi avadanlıqlarla təmin olunması, canları bahasına xəstələri müalicə edən həkimlərin əməkhaqlarına əlavələr edilməsi, işləməyənlərə yardımların verilməsi, sosial iş yerlərinin açılması, sahibkarlara maliyyə dəstəyinin və güzəştlərin edilməsi və digər işlər çox təqdirəlayiqdir.
Əziz Prezidentimiz, Azərbaycan vətəndaşları arasında bu xəstəlikdən ölüm hallarının minimuma endirilməsi üçün gördüyünüz bütün işlərə görə Sizə minnətdarlığımı bildirirəm”.
Hacı Əliyevdən, Bakı, Azərbaycan
“Möhtərəm cənab Prezident.
Bütün Azərbaycan vətəndaşları kimi, biz də Sizin və hörmətli Birinci vitse-prezidentimiz Mehriban xanım Əliyevanın fəaliyyətinizi yüksək qiymətləndiririk. COVID-19 pandemiyasının ölkəmizə ayaq açdığı andan virusun qarşısını almaq üçün gördüyünüz bütün qabaqlayıcı tədbirlərə və bu gün də apardığınız mübarizəyə görə Sizinlə fəxr edirik. Allahdan Sizə və ailənizə möhkəm cansağlığı diləyir, bizi hər zaman düşündüyünüz və ölkəmizin qayğısına qaldığınız üçün təşəkkürümü bildirirəm. Allah Sizi Azərbaycana və azərbaycanlılara çox görməsin. Biz birlikdə güclüyük”.
Mövzu ilə əlaqədar oxuyun:
“Hər zaman yanımızda olduğunuz üçün Sizə təşəkkürümü bildirirəm” – Prezidentə yazırlar
“Biz Sizə inanır, güvənir və arxalanırıq” – Prezidentə yazırlar
S.Xankişiyeva
