İkinci MFL Kubokuna start verilir: qaliblər millinin oyununu izləmək üçün San-Marinoya gedəcəklər – FOTO

İlk kubok çempionatına olan marağı nəzərə alan “Mini Fubol Liqası” şirkəti yerli futbol azarkeşlərini yenidən meydana dəvət edir.

1news.az-ın məlumatına görə, bu dəfə onlar MFL San-Marino kuboku uğrunda mübarizə aparacaqlar.

İyulun 24-də başlayacaq kubok çempionatı avqustun 20-nə kimi davam edəcək. Həvəskar futbolçuların kubok çempionatının bu dəfəki qaliblərini isə MFL San Marinoya - 2018-ci ildə keçiriləcək Dünya Çempionatının seçmə mərhələsi çərçivəsində Azərbaycan - San Marino oyununu izləməyə göndərəcək.

Növbəti MFK üçün komandaların qeydiyyatı isə iyulun 5-də başlayacaq. Müraciətlərin son tarixi 18 iyul, saat 21:00-dır. MFK-nın ikinci kubokunda 32 komanda iştirak edəcək. Qeydiyyatdan keçən hər komanda 200 AZN dəyərində rüsum ödəməlidir.

Qeydiyyat şərtləri:

- Yaşı 16-dan yuxarı olan hər kəs şəxsiyyəti təsdiqləyən sənədi təqdim etməklə çempionata qatıla bilər;

- Hər komanda minimum 6, maksimum 10 nəfərlik heyətlə qeydiyyatdan keçməlidir. Kapitanlar komandanın adını, oyunçuların siyahısını yazıb və şəxsiyyət vəsiqələrini scan edib, [email protected] elektron ünvanına göndərməlidirlər;

 - Qeydiyyat ərizəsində olan bütün oyunçuların şəxsiyyət vəsiqələrinin surəti göndərildikdən sonra komanda qeydiyyatdan keçmiş sayılır;

- Qeydiyyat bitəndən sonra, yəni 18 İyul, saat 21:00-dan sonra komandaların heyətinə əlavə və dəyişiklik etmək mümkün olmayacaq;

- 18 İyul, saat 21:00-a qədər qeydiyyat ərizəsində olan bütün oyunçuların şəxsiyyət vəsiqələrini təqdim etməmiş komanda Kubokda iştirak edə bilməyəcək;

- Qeyd olunmuş şərtlərə uyğun iştirak ərizəsini göndərmiş bütün komandaların namizədliyi son qeydiyyat gününə kimi saxlanacaq; 

 - İlk 32 komanda çempionatda iştirak edəcək. Qeydiyyatdan keçmiş ilk 32 komandadan birinin və ya bir neçəsinin hər hansı səbəbdən çempionatda iştirakı mümkün olmasa, müraciət tarixinə əsasən növbədə olan digər komanda(lar) qeydiyyata alınacaq.

Oyunçular üçün:  

- Son 3 ildə peşəkar futbolla məşğul olanlar çempionata qatıla bilməzlər; 
- Futzal üzrə Azərbaycan çempionatının “yüksək” liqasında və “birinci” liqada iştirak edənlər çempionata qatıla bilməzlər.

Oyunun şərtləri:

 - Oyunçulardan 6-ı meydanda (5 nəfər oyunçu, 1 nəfər qapıçı) oynayacaq. Ehtiyat oyunçular (maksimum 4 nəfər) oyun zamanı meydançada olmalıdırlar;

- Turnir boyu komandalar təyin olunmuş və komandalara öncədən xəbər olunmuş oyunlara gəlməlidirlər;

- Oyuna gəlməyən komanda üçün texniki məğlubiyyət nəticəsi qeydə alınır;
- Meydançaların üzəri torla örtülü olacaq;

- Turnirdə istifadə olunacaq futbol topunun ölçüsü 5-dir.

Çempionatın formatı barəsində ətraflı məlumat komandaların qeydiyyatı başa çatdıqdan sonra veriləcək.

Xatırladaq ki, 22 may – 19 iyun tarixlərində ilk MFL Kuboku turniri keçirildi. 24 komandanın qatıldığı yarışın ilk qalibi həlledici görüşdə “Napoli”in 1:0 hesabı ilə üstələyən “Qaradağ-Lökbatan” komandası oldu.

İyulun 6-da MFL Euro2016 Kuboku çempionu olan “Qaradağ-Lökbatan” komandasını 1 həftəlik Fransaya, Liona - Avro-2016 çempionatının yarımfinal oyunlarını izləməyə göndərdi. Qalib komandanın bütün xərcləri - yol, otel, qidalanma, oyuna bilet məsrəfləri MFL şirkəti tərəfindən qarşılandı.

Nəzərinizə çatdıraq ki, MFK kubokundan sonra, sentyabr ayında Mini Futbol Liqası start götürəcək. İyul ayı ərzində liqanın şərtləri və qaydaları barəsində ətraflı məlumat veriləcək. Liqaya qoşulacaq komandaları, futbol azarkeşlərini də kifayət qədər maraqlı oyunları canlı izləmək imkanı gözləyir.

Qeyd edək ki, Mini Futbol Kuboku çempionatının təşkilatçısı “Sport Marketing Group” - SMG şirkətidir. MFL çempionatlarına ev sahibliyini isə “Sportster” - idman kompleksi edir.         

Qeydiyyat və çempionat haqqında əlavə məlumat üçün (+994) 055 263 73 12 nömrəsi ilə əlaqə saxlaya, eyni zamanda [email protected] elektron ünvanına yaza bilərsiniz. Ətraflı məlumat üçün MFL-in https://www.facebook.com/mfl.baku “Facebook” səhifəsini izləyin.

1news.az