Akif Aşırlı: Azərbaycanda təxribat yaradan qüvvələr heç zaman xalqın dəstəyini qazana bilməyəcəklər

Gəncədə baş verən hadisələr Azərbaycan dövlətinə, onun müstəqilliyinə, Konstitusion hüquqlarının dəyişdirilməsinə yönələn təxribat xarakterli hərəkətlərdir.

1news.az xəbər verir ki, bunu “Şərq” qəzetinin baş redaktoru Akif Aşırlı Gəncə hadisələrinə münasibət bildirərkən deyib

“Bu hərəkətlərin qarşısı Azərbaycan dövləti, eyni zamanda Azərbaycanın müstəqilliyini canı qədər sevən vətəndaşları tərəfindən alındı, əhali bu aksiyalara dəstək vermədi. Bunun da mahiyyəti ondan ibarətdir ki, Azərbaycanın müstəqilliyinə, onun dünyəvi quruluşuna yönələn hər bir cəhd bütün vətəndaşlarımız tərəfindən qətiyyətlə pislənilir”.

Təxribatçı qrupların kənardan idarə olunduğunu deyən baş redaktor onların əsas məqsədlərinin ölkədə xaos yaratmaq olduğunu söyləyib:

“Təbii ki, müəyyən qruplar var ki, kənardan müəyyən ideoloji mərkəzlər tərəfindən idarə olunur. Çox təəssüf ki, onların Azərbaycanda havadarları, bir sıra mərkəzləri də var. Bu mərkəzlər zaman-zaman sosial şəbəkələr üzərindən Azərbaycan dövləti və hakimiyyəti əleyhinə təbliğatlar aparırlar. Onların əsas məqsədi ondan ibarətdir ki, Azərbaycanda vətəndaş itaətsizliyi, bunun nəticəsində də bir xaos yaratsınlar və beləliklə də Azərbaycanı Suriyaya çevirsinlər”.

A.Aşırlının sözlərinə görə, bu qüvvələr Azərbaycanda müxtəlif çağırışlar etsələr də, qanqaraldıcı hadisələr baş versə də heç zaman Azərbaycan xalqının dəstəyini qazana bilməyəcəklər:

“Çünki Azərbaycan xalqı kifayət qədər siyasi savada malik bir xalq olmaqla siyasi prosesləri çox düzgün analiz edirək düzgün nəticələr çıxarır. Eyni zamanda müşahidə etdik ki, cəmiyyətin bir kəsimi olan, sağlam müxalifət hesab etdiyimiz qüvvələr də bu cür təxribat xarakterli hadisələrə, mənbəyi bəlli olmayan, ölkəmizdə iğtişaş yaratmaq istəyənlərə dəstək vermədi. Bu onu göstərir ki, Azərbaycan dövlətinin yeritdiyi siyasət doğru siyasətdir və bu siyasətin alternativi yoxdur”.

1news.az