“Azərişıq” artıq borc yazılmasına aydınlıq gətirdi: heç bir şübhəniz olmasın

Son günlər artıq işıqpulu gəlməsindən narahat olan hörmətli abonentlərimizin diqqətinə çatdırmaq istəyirəm ki, göstəricilər hər birinizin elektrik sayğaclarınızdan oxunaraq təqdim olunur.

1news.az xəbər verir ki, bunu “Azərişıq” ASC-nin mətbuat xidmətinin rəhbəri Tanrıverdi Mustafayev son günlər sosial şəbəkələrdə elektrik enerjisinə görə artıq borcun yazılması ilə bağlı yayılan xəbərlərə münasibət bildirərkən deyib.

“Tanımadığım bir abonentin mənə Facebookdan göndərdiyi bildirişin doğru olub-olmadığını sizlərlə birlikdə aydınlaşdırmaq istədim. Tamamilə doğru olduğuna heç bir şübhəsi olmasın. Buyura bilərsiniz: Abonentin saygacının son indeks göstəricisi 50 909 (04 avqust 2018-ci il tarixi), əvvəlki göstərici 50 492 (05 iyul 2018-ci il). 50 909 - 50 492 = 417 (Orta məktəbdə hər halda həndəsəni yaxşı oxumasam da, Cəbr (Riyaziyyat) fənnindən 5 almışam).

30 gün ərzində hörmətli abonent 417 kvt/s. elektrik enerjisindən istifadə edib. 300 kvt/s. X 0,07 = 21 AZN (300 kvt/s. - Güzəştli tarif - 0,07 AZN-la hesablanır). 417 kvt/s. - 300 kvt/s. = 117 kvt/s. edir. 117 kvt/s. X 0,11 = 12.87 AZN edi. Cəmi - 33,87 AZN. Bildirişdə də ödəniləcək məbləğ 33,87 AZN göstərilib”.

1news.az