Beynəlxalq təşkilatlar Mehman Hüseynovla bağlı qərarı alqışlayıblar
Bir sıra beynəlxalq təşkilatlar azərbaycanlı bloqqer Mehman Hüseynova qarşı cinayət işinə xitam verilməsini alqışlayıblar.
1news.az xəbər verir ki, Avropa Parlamenti, ATƏT və AŞPA bununla bağlı rəsmi bəyanatlarla çıxış edib.
ATƏT-in mətbuat azadlığı üzrə nümayəndəsi Arlem Desirin bəyanatında vurğulanıb: "Mən Azərbaycan hakimiyyətinin Mehman Hüseynova qarşı yeni ittihamın aradan qaldırılmasına dair qərarını alqışlayıram".
O qeyd edib ki, əvvəllər bu vəziyyətlə bağlı öz narahatlığını ifadə edib və Azərbaycanın xarici işlər nazirinə bununla bağlı məktub ünvanlayıb.
Öz növbəsində, ATƏT Parlament Assambleyasının prezidenti Georgi Tseretelin bəyan edib:
"Mehman Hüseynova qarşı yeni ittihamın irəli sürülməsi narahatlıq doğurdu və mən hazırda bu işə xitam verilməsindən çox şadam. Mən onun işini yaxından izlədim və müntəzəm olaraq millət vəkilləri ilə, eləcə də Azərbaycan Prezidenti ilə söhbətlərdə bu məsələni diqqətdə saxladım. Prezident İlham Əliyev şəxsən bu məsələyə diqqət yetirməsindən məmnunam".
Avropa Parlamentinin Cənubi Qafqaz üzrə nümayəndə heyətinin rəhbəri Sacid Kərim isə bildirib ki, bu müsbət addımı tam şəkildə alqışlayır:
“Mən Mehman Hüseynovun azadlığa buraxılmasını və ailəsinə qovuşmasını səbrsizliklə gözləyirəm”.
Avropa Şurası Parlament Assambleyasının (AŞPA) Azərbaycan üzrə həmməruzəçiləri Rocer Qeyl (Böyük Britaniya) və Ştefan Şennak (Avstriya) bəyan ediblər ki, "bu, kiçik, lakin düzgün istiqamətdə əhəmiyyətli bir addımdır”.
P.Sultanova
