Sarkisyan: Ermənistan KTMT-də ciddi uğursuzluq riski qarşısındadır
Ermənistan KTMT-də ciddi uğursuzluq riski qarşısındadır.
1news.az erməni mətbuatına istinadla xəbər verir ki, bunu Ermənistanın sabiq müdafiə naziri, Respublika Partiyası sədrinin birinci müavini Viqen Sarkisyan bildirib.
O deyib: "Hökumət KTMT baş katibinin vəzifəsini 6 dekabrda Sankt-Peterburqda itirməmək üçün hər şeyi etməlidir. Əgər bu baş verərsə, bu, hökumətin uğursuzluğu olacaq".
Sabiq nazirin sözlərinə görə, bu risk Yuri Xaçaturovun əleyhinə qəbul ediləcək tədbirlərdə nəzərə alınmalıdır.
"Ermənistan həmişə KTMT-nin fəal üzvü olub. Ümid edirəm ki, baş nazir Nikol Paşinyanın Ermənistanın xarici siyasət vektorunu dəyişdirməyəcəyinə dair verdiyi bəyanatlar reallıqda əksini tapacaq. Əks təqdirdə, ciddi problemlərlə üzləşəcəyik", - Sarkisyan bildirib.
Xatırladaq ki, Y.Xaçaturov Ermənistan tərəfinin təşəbbüsü ilə KTMT-nin baş katibi vəzifəsindən vaxtından əvvəl geri çağırılıb.
Noyabrın 8-də Qazaxıstanın paytaxtı Astana şəhərində KTMT-nin Kollektiv Təhlükəsizlik Şurasının iclası keçirilib.
Şuranın iclasında Rusiya prezidenti Vladimir Putin, Belarus prezidenti Aleksandr Lukaşenko, Qazaxıstan prezidenti Nursultan Nazarbayev, Qırğızıstan prezidenti Sooronbay Jeenbekov və Ermənistan baş naziri səlahiyyətlərini icra edən Nikol Paşinyan iştirak edib.
Liderlər həm qapalı, həm də geniş tərkibli formatda görüşlər keçiriblər.
KTMT-nin prosedur və rotasiya qaydalarına və əlifba sırası ardıcıllığına uyğun olaraq, 2020-ci ilə qədər baş katib vəzifəsini Ermənistan nümayəndəsi daşımalı idi. Yuriy Xaçaturovun vaxtından əvvəl vəzifədən azad edilməsindən sonra Paşinyan 2020-ci ilə qədər baş katib vəzifəsini Ermənistanda saxlamağa çalışsa da, tamamilə uğursuzluqla üzləşdi. Ermənistanın yeni namizədinin təşkilatın baş katibi olmasına icazə verilmədi.
Prezident Nursultan Nazarbayev rus dili üzrə əlifba ardıcıllığına görə Ermənistandan sonra növbəti baş katibin Belarusdan olmalı olduğunu bildirib.
Qeyd edək ki, KTMT baş katibi vəzifəsinə Belarusun Təhlükəsizlik Şurasının katibi, Bakı hərbi məktəbinin məzunu olmuş 54 yaşlı Stanislav Zasın təyin olunması gözlənilir.
P.Sultanova
