Paşinyan ordu üçün pul axtarışındadır
Ermənistan silahlı qüvvələrinin inkişafı üçün qarşıdakı beş il ərzində hərbi büdcəni təqribən 2,5 milyard dollara çatdırmalıyıq.
1news.az erməni mətbuatına istinadla xəbər verir ki, bunu Ermənistanın baş naziri vəzifəsini icra edən Nikol Paşinyan hökumətin iclasında deyib.
Bu maliyyənin haradan cəlb ediləcəyinə gəlincə, o bildirib ki, həmin vəsaiti tapmaq üçün çox ciddi işləmək lazımdır.
Onun sözlərinə görə, bu vəsaitlərin bir hissəsi silahlı qüvvələrin döyüş hazırlığının artırılması baxımından çox mühüm olan hərbçilərin sosial vəziyyətinin yaxşılaşdırılmasına yönəldilməlidir.
Paşinyan deyib ki, hərbi-sənaye kompleksinin inkişafı da digər vacib vəzifə olmalıdır: “Biz bu sahədə ciddi inkişafa nail olmalıyıq. Bu problemin həlli Ermənistanın texnoloji bir ölkəyə çevrilməsi, eləcə də mühəndislik və texniki elmin inkişafı ilə bağlıdır. Bu, şübhəsiz ki, gələcək üçün ən mühüm vəzifələrdən biridir".
P.Sultanova
