Pakistanda yanacaq daşıyan avtomobilin yanması nəticəsində 150-dən çox adam ölüb

Pakistanın şərqində yerləşən Pəncab əyalətində yanacaq daşıyan avtomobilin yanması nəticəsində ölənlərin sayı 152 nəfərə çatıb.

1news.az-ın Rusiya mətbuatına istinadən verdiyi xəbərə görə, dəhşətli hadisə nəticəsində 110 nəfər xəsarət alaraq xəstəxanalara yerləşdirilib.

Qeyd edək ki, hadisə iyunun 25-i, səhər saatlarında yanacaq daşıyan yük maşınının aşmasından sonra qeydə alınıb. Yerli sakinlər maşının çənindən yanacaq yığmaq istəyərkən qəfil güclü partlayış baş verib.

Nəticədə onlarla maşın və 75 motosiklet yanıb. Yanğını bir neçə saatdan sonra söndürmək mümkün olub.

İlkin ehtimala görə, yanğının baş verməsinə səbəb atılan siqaret kötüyü olub.

Faktla bağlı araşdırmalar davam edir.

Babək Cahandarov