Bakıda hüquqi şəxslərin cinayət məsuliyyəti mövzusunda simpozium keçirilib - FOTO

Dekabrın 1-də Avropa İttifaqı ilə birlikdə həyata keçirilən “Azərbaycanda ədliyyə sisteminin inkişafına və cinayət işləri üzrə məhkəmə qərarlarını icra edən qurumların göstərdiyi xidmətlərin təkmilləşdirilməsinə dəstək” layihəsi çərçivəsində “Hüquqi şəxslərin cinayət məsuliyyəti” mövzusunda simpozium keçirilib.

Baş Prokurorluğun mətbuat xidmətindən 1news.az-a verilən məlumata görə, Azərbaycan Respublikası Baş Prokurorluğunun əməkdaşlarının, birinci və apellyasiya instansiyaları məhkəmələrinin hakimlərinin qatıldığı tədbirdə Baş Prokuror yanında Korrupsiyaya Qarşı Mübarizə Baş İdarəsinin təşkilati və informasiya təminatı idarəsinin rəisi Heydər Məmmədov çıxış edərək korrupsiyaya qarşı mübarizənin ölkəmizdə dövlət siyasətinin prioritet istiqaməti olmasını vurğulayıb, bu mübarizənin güclü siyasi iradəyə əsaslandığını xüsusi qeyd edib. Həmin sahədə beynəlxalq əməkdaşlığın və təcrübə mübadiləsinin böyük əhəmiyyət kəsb etdiyini bildirib.

Baş İdarənin daxili təhlükəsizlik şöbəsinin rəisi Vüqar Quliyev təqdimatla çıxış edərək layihə çərçivəsində hüquqi şəxslərin cinayət məsuliyyəti mexanizminin xüsusiyyətlərinin öyrənilməsi məqsədilə Niderland Krallığına nəzərdə tutulan tanışlıq səfəri barədə tədbir iştirakçılarına ətraflı məlumat verib.

Simpoziumda Avropa Şurasının ekspertləri hüquqi şəxslər tərəfindən törədilən korrupsiya cinayətlərinə qarşı mübarizənin aspektləri, bu kateqoriyadan olan cinayətlərlə mübarizə sahəsində müsbət təcrübə, hüquqi şəxslərin cinayət məsuliyyətinə cəlb olunmasının hüquqi və praktiki tərəfləri barədə təqdimatlar keçirib, iştirakçıları maraqlandıran sualları cavablandırıblar.

Tədbirin sonunda iştirakçılara müvafiq sertifikatlar təqdim edilib.

1news.az