Ən bahalı futbolçular – SİYAHI
Beynəlxalq İdman Araşdırmaları Mərkəzi (CIES) Avropanın beş böyük futbol çempionatlarında çıxış edən klubların heyətindəki ən bahalı futbolçuların adlarını açıqlayıb.
1news.az-ın AZƏRTAC-a istinadən verdiyi xəbərə görə, mərkəzin hazırladığı “2018-ci ilin yanvar ayı üçün ən bahalı futbolçular” adlı hesabatda La Liqa (İspaniya), Premyer Liqa (İngiltərə), A Seriyası (İtaliya), Bundesliqa (Almaniya) və Liqa 1-də (Fransa) çıxış edən futbolçuların qiymətləri müəyyənləşib. Hesabat hazırlanarkən futbolçuların yaşı, müqavilələrinin müddəti, mövqeləri, klubda və milli komandadakı çıxışları və s. kriteriyalar əsas alınıb.
CISM bu kateqoriyalar əsasında ən bahalı futbolçu kimi “PSJ” klubunun braziliyalı legioneri Neymarı müəyyənləşdirib. Neymarın dəyəri 213 milyon avro məbləğində qiymətləndirilib. Braziliyalı futbolçunu onun sabiq komanda yoldaşı, “Barselona”nın argentinalı ulduzu Lionel Messi izləyib - 202,2 milyon avro. “Tottenhem”in ingiltərəli hücumçusu Harri Keyn 194,7 milyon avroluq qiymətlə üçüncü yerdə qərarlaşıb. “PSJ”nin “Monako”dan transfer etdiyi Kaylian Mbappe 192,5 milyon avro ilə dördüncü sırada yer alıb.
Siyahıda sonrakı yerləri Paulo Dibala (“Yuventus”, 174,6 milyon avro), Dele Alli (“Tottenhem”, 171,3 milyon avro), Kevin De Brüyn (“Mançester Siti”, 167,8 milyon avro), Romelu Lukaku (“Mançester Yunayted”, 164,8 milyon avro), Antuan Qrizman (“Atletiko Madrid”, 150,2 milyon avro) və Pol Poqba (Mançester Yunayted”, 147,5 milyon avro) tuturlar.
CIES “Real Madrid”in portuqaliyalı ulduz futbolçusu, 33 yaşlı Kriştiano Ronaldonu siyahıda 49-cu yerdə qərarlaşdırıb. Ötən il rəqib qapılarına 53 dəfə yol tapan, UEFA Çempionlar Liqasının, UEFA Super Kubokunun, La Liqanın, İspaniya Super Kubokunun və FIFA klublararası dünya çempionatının qalibi olan, beşinci dəfə ilin futbolçusu adını qazanan Kriştiano Ronaldoya 80,4 milyon avro qiymət qoyulub.
1news.az
