Sahibə Qafarova: “Bu müharibədə Ermənistan elə ağır zərbə aldı ki, onun özünə gəlməsi üçün neçə illər lazım olacaq”
“Hörmətli həmkarlar bu gün Azərbaycan Bayrağı Füzulidə,Cəbrayılda,Qubadlıda, Zəngilanda və Şuşada qürurla dalğalanır. Tezliklə Kəlbəcərdə, Ağdamda, Laçında və digər torpaqlarımızada dalğalanacaq”.
1news.az xəbər verir ki, bunu Milli Məclisin sədri Sahibə Qafarova çıxışında deyib.
“Vətən müharibəsinin ən şərəfli səhifələrindən biri noybarın 8-də Qarabağın incisi və tacı, Azərbaycan mədəniyyətinin beşiyi olan olan Şuşa şəhərinin işğaldan azad edildiyi gün oldu. Mən əminəm ki, Şuşanı, digər şəhər və kəndlərimizi düşməndən təmizləyən əsgər və zabitlərimiz qəhrəmanlığı dillərdə dastan olacaq. Azərbaycan Ordusu döyüş meydanında göstərdiyi hünərlər ilə xalqımızın nəyə qadir olduğunu dünyaya nümayiş etdirdi. Bu tarixi günlərin bizim üçün ən mühüm nəticələrindən biri də xalqımızın Ali Baş Komandan İlham Əliyevin ətrafında yumruq kimi birləşməsi və bütövləşməsi oldu. Azərbaycan Xalqının birliyinin rəmzinə çevrilən bu yumruq düşmənə endirilən ağır zərbələrin ifadəsi idi. Çətin sınaq qarşısında qalan Azərbaycan xalqının yenilməz gücə çevrildiyini hərkəs görüb yəqin etdi. Bu birliyin qarşısında düşmən duruş gətirə bilməzdi və gətirə də bilmədi. Hörmətli həmkarlar, bildiyiniz kimi noyabrın 10-da Azərbaycan Prezidenti, Rusiya Prezidenti və Ermənistanın baş naziri tərəfindən imzalanmış üçtərəfli bəyanatla Ermənistan-Azərbaycan Dağlıq Qarabağ münaqişəsinə son qoyuldu. Bu bəyanatın Azərbaycan Respublikası üçün çox böyük tarixi əhəmiyyəti var. Belə ki, bəyanatın müddəalarına əsasən, 2020-ci il dekabrın 1-dək Ermənistan Silahlı Qüvvələri Azərbaycanın işğal edilmiş ərazisindən çıxarılacaq, Kəlbəcər, Ağdam və Laçın rayonları isə qan tökülmədən, şəhidlər verilmədən Azərbaycana qaytarılacaq. Bununla da Azərbaycanın ərazi bötövlüyü təmin ediləcək, məcburi köçkünlərimiz öz doğma yurdlarına dönə biləcəklər. Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsinin bərpası da milli maraqlarımızın təmin edilməsi baxımından vacib məsələdir”.
“Bu müharibədə Ermənistan elə ağır zərbə aldı ki, onun özünə gəlməsi üçün neçə illər lazım olacaq” –deyə Spiker fikirlərinə əlavə edib:
“Biz bu gün hamımız Yerevanda olanları müşahidə edirik, bir tərəfdən şəhərin küçələrində kütlə azğınlıq edir, hərcmərclik edir, digər tərəfdən isə iqtidar müxalifətin bütün liderlərini həbs edir, müxalif deputatların mandatlarından azad edilməsi barədə fikirlər gəzir. Diqqət yetirin, bütün bu rüsvayçı məsələlər qərbin bəzi dairələrinin demokratik ölkə kimi qələmə verdiyi yerdə baş verir” .
Qafar Ağayev
