Türkiyənin Muğla bölgəsində yanğının söndürülməsinə helikopter və təyyarələr cəlb olunub - FOTO
Türkiyənin Muğla bölgəsinin Marmaris rayonunda ötən gün başlayan meşə yanğını gecə saatlarında müəyyən qədər qarşısı alınsa da, yenidən alovlanıb.
1news.az Anadolu Agentliyinə istinadən xəbər verir ki, 250 hektar ərazini əhatə edən yanğının söndürülməsinə 20 helikopter və 14 təyyarə cəlb olunub.
Yanğının qarşısının alınmasında ümumilikdə 1494 yanğınsöndürən, 363 yanğınsöndürən maşın və 39 texnika iştirak edir.
Daxili işlər naziri Süleyman Soylu, kənd təsərrüfatı və meşəçilik naziri Vahit Kirişçi və digər rəsmi şəxslər yanğın bölgəsindədir.
Yanğının səbəbləri hələlik məlum deyil. Dronlar tərəfindən aşkarlanan yanğın küləyin təsiri nəticəsində qısa müddətdə böyük əraziyə yayılıb.
Yanğın təhlükəsi ilə əlaqədar 30 ev təxliyə edilib.
Daxili işlər naziri Soylu yanğının sabotaj olması ehtimalının araşdırıldığını bildirib.
