DTA rəsmisi: “Turizm İnformasiya Sistemi bu sahədə olan şirkətlər haqqında məlumat almağa imkan verəcək”

“Uzun müddətdir üzərində işlədiyimiz layihənin təqdimatını edirik”.

1news.az xəbər verir ki, bunu Turizm Agentliyinin aparat rəhbəri Kənan Qasımlı Turizm İnformasiya Sisteminin təqdimat mərasimində deyib.

“Bu bizim üçün bir qədər çətin keçən yol oldu, ilk dəfədir belə bir informasiya sistemi təqdim olunur. Çalışırdıq elə sistem yaradaq ki, həm işlək bir mexanizm olsun, həm də nəticə yönümlü sistem olsun.
Aparılan müzakirələr və görülən işlərin nəticəsində kifayət qədər yaxşı iş görə bilmişik” .

“2015-ci ildən etibarən turizm sənayesi lisenziyasız fəaliyyət göstərən sahələrdəndir” - deyə, K. Qasımlı bildirib.

“Lisenziyasız fəaliyyət bazarda şirkətlərin, bu sahədə fəaliyyət göstərənlərin sayının artmasına səbəb olmuşdu. Turizm sənayesi ilə bağlı çalışanların sayının artması sevindirici olsa da, rəqabətin pozulması ilə bağlı Agentliyə müraciət edənlərin sayı da kifayət çox idi. Bu məsələyə nəzarət mexanizmi yox idi. Biz ümid edirik ki, bu reyestr sayəsində turizm sənayesində olanlar bir birini tanıyacaq” .

Aparat rəhbəri qeyd edib ki ki, turizm sahəsində fəaliyyət göstərən bütün şirkətlər bu sistemdə inteqrasiyası olacaq.

“Həm sənaye subyektləri, həm dövlət qurumları, eyni zamanda potensial müştərilər hər bir şirkət haqqında ətraflı məlumat əldə edəcəklər . Sistem üzərindən gətirdiyimiz keyfiyyət nişanları vasitəsilə də sənaye subyektinə yaxınlaşmadan hansı kateqoriyada olduğu ilə bağlı informasiya almaq mümkün olacaq” .

K.Qasımlının sözlərinə görə, bu şirkətlərə həm öz marketinq siyasətini aparmağa imkan verəcək, eyni zamanda müştərilərin, digər sənaye subyektlərinin münasiblərdə kimlərlə hansı səviyyədə ünsiyyət qurduğunu biləcəklər. Bu kifayət qədər çətin sistem idi,dövlət qurumlarının informasiya sistemlərinə inteqrasiya məsələsi var idi” .