“Ermənistan törətdiyi təxribatlarla bu günə kimi əldə edilən nəticələrə kölgə salmaq istəyir” – Ceyhun Məmmədov

“Ermənistanın törətdiyi təxribatlar ilk dəfə törədilmir”.

Bunu 1news.az-a açıqlamasında Milli Məclisin deputatı Ceyhun Məmmədov deyib.

“Görünən odur ki, Ermənistan sülh istəmir, bu günə kimi imitasiya ilə məşğuldular. Azərbaycan bölgəyə sülhün gəlməsində maraqlıdır. Ermənistan törətdiyi təxribatlarla bu günə kimi əldə edilən nəticələrə kölgə salmaq istəyir. Belə bir görüntü yaratmaq istəyir ki, sanki Azərbaycan sülh istəmir və sərhəddə təxribatı törədən də Azərbaycandır. Əslində ilə hamıya məlum olduğu kimi reallıq fərqlidir, təxribatları törədən Ermənistandır” – o, qeyd edib.

Deputat deyib ki, beynəlxalq təşkilatlar bu məsələdə yenə də öz ikili standartları ilə, qərəzli yanaşmalar ilə yanaşırlar.

“Beynəlxalq təşkilatların Ermənistanla bağlı hansısa sərt çağırışını, Ermənistanın bu addımını pisləyən bəyanatına rast gəlmirik. Qərbin ikili standartları, Ermənistanın əvvəlki dövrlərdə törətdiyi təxribatlara heç bir reaksiya verilməməsi, sanksiya tətbiq edilməməsi və s. məsələlər məğlub Ermənistana təxribatlar üçün cəsarət verir. Ona görə beynəlxalq təşkilatlar öz siyasətlərinə yenidən baxmalı, ikili standartlara son qoymalıdır. Ermənistanın bu əməlləri qınanmadıqca, sanksiya tətbiq edilmədikcə, təxribatlarına göz yumulduqcaq bu proses davam edəcək”.

“Bölgədə sülhün gəlməsi üçün Azərbaycan çalışır, amma bu məsələdə təkcə Azərbaycanın çalışması bəs etmir” – deyə, C.Məmmədov əlavə edib:

“Eyni zamanda qərb dövlətləri və region dövlətləri də bu məsələlərdə maraqlı olmalıdır. Real addımlar ortaya qoyulmalıdır. Amma bu olmadıqca Ermənistan eyni təxribatlara davam edəcək və eyni addımları atacaq”.

Xatırldaq ki, mayın 10-da axşam saatlarından başlayaraq Ermənistan silahlı qüvvələrinin bölmələri Basarkeçər rayonunun Zod istiqamətində yerləşən mövqelərindən Azərbaycan Ordusunun üzbəüz mövqelərini müxtəlif növ atıcı silahlardan intensiv atəşə tutmaqla qəsdən təxribat törədib.

Nəticədə Azərbaycan Ordusunun hərbi qulluqçuları - Novruzəlizadə Orxan Elxan oğlu həlak olub, Mahmudlu Müslüm Vidadi oğlu ağır yaralanıb.