Aynurə Salmanlı: “Ölkəmizin taleyində mühüm rol oynayan seçkilərdə Azərbaycan gəncləri fəallıq göstərir”
“Gənclərin Maarifləndirilməsinə Dəstək” İctimai Birliyinin sədri Aynurə Salmanlı “Seçki 2024” Müstəqil Media Mərkəzinin suallarını cavablandırıb.
1news.az Aynurə Salmanlının müsahibəsini təqdim edir:
- Müstəqilliyini əldə edəndən sonra ilk dəfə Azərbaycanın bütün suveren ərazilərində keçiriləcək parlament seçkilərinin həm ölkəmiz, həm də regional siyasət üçün əhəmiyyəti nədən ibarətdir?
- Sentyabr 1-də Azərbaycan Respublikası Milli Məclisinə keçiriləcək növbədənkənar parlament seçkiləri dövlətçilik baxımından mühüm əhəmiyyət kəsb edir. Son illər Azərbaycanda dövlət idarəçiliyinin bütün sahələrində uğurla və ardıcıl şəkildə gerçəkləşdirilən məqsədyönlü islahatlar nəticəsində ölkəmiz yeni inkişaf mərhələsinə qədəm qoyub. Sentyabrın 1-də keçiriləcək seçkilərlə Azərbaycan parlamenti tarixində dövlətin suverenliyinə və ərazi bütövlüyünə söykənən ilk Milli Məclis formalaşdırılacaq. Çünki ölkəmiz 30 il ərzində Ermənistanın işğalçılıq siyasəti səbəbindən belə bir Milli Məclis formalaşdıra, indiki kimi seçkilər keçirə bilməyib. Hazırki şəraitdə isə ilk dəfə olaraq Azərbaycanın tamamlanmış suverenliyinə və bütöv ərazi prinsipinə söykənən parlament seçkiləri nəzərdə tutulur. Bu tarixi hadisə həm böyük dövlətçilik nailiyyəti, həm də yeni parlamentin üzərinə çox böyük məsuliyyət qoyulması deməkdir. Yəni, artıq Milli Məclisin deputat korpusu bəzi mühüm məqamları da öz fəaliyyətində nəzər almalı olacaq. Həmin məsul şəxslər müstəqil Azərbaycanın tarixində suverenlik və ərazi bütövlüyü prinsipi çərçivəsində seçilən və bu şərəfi daşıyan ilk deputatlar kimi tarixə düşəcəklər.
- Gənclərin ölkədə gedən proseslərdə, xüsusilə seçkilərdə rolunu necə qiymətləndirirsiniz? Gənclər seçki prosesində aktiv iştirak edirmi?
- Azərbaycan gəncləri cəmiyyətimizin fəal hissəsidir. Ümumilikdə, gənclər siyasəti gənclərin siyasi proseslərə inteqrasiyasıdır. II Qarabağ müharibəsində gənc oğullarımızın Vətən torpaqlarını öz canları bahasına işğaldan azad etməsi buna ən bariz nümunədir. Bu gün müstəqil dövlətimizdə yaradılan siyasi şərait, şübhəsiz, mütərəqqi gənclər siyasətinin də səmərəliliyinin artırılmasına səbəb olub. Sevindirici haldır ki, hazırda kifayət qədər qabiliyyətli, istedadlı, vətənsevər, gənclərimiz ölkənin ictimai-siyasi proseslərində yaxından iştirak edir.
Hazırda sentyabrın 1-də Azərbaycan Respublikası Milli Məclisinə keçiriləcək növbədənkənar parlament seçkilərinin təşviqat mərhələsi davam edir. Müşahidələr göstərir ki, bu prosesdə də Azərbaycan gəncləri fəallıq göstərir. Artıq hər bir azərbaycanlı anlayır ki, gənc nəslin nümayəndələri yüksək tribunalarda Azərbaycanı layiqincə təmsil etmək iqtidarındadır.
