“Maliyyə əməliyyatlarında şəffaflığın təmin edilməsi üzrə təlim proqramı” təqdim edilib
“Maliyyə əməliyyatlarında şəffaflığın təmin edilməsi üzrə təlim proqramı” təqdim olunub.
1news.az AZƏRTAC-a istinadən xəbər verir ki, Azərbaycan Respublikası Prezidentinin 2016-cı il 18 noyabr tarixli Sərəncamı ilə təsdiq edilmiş "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizəyə dair 2017-2019-cu illər üçün Milli Fəaliyyət Planı"nın, 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında maliyyə xidmətlərinin inkişafına dair Strateji Yol Xəritəsi"nin və "Azərbaycan iqtisadiyyatının Strateji Yol Xəritəsi: hesabatlılıq və şəffaflıq problemləri" mövzusunda beynəlxalq elmi-praktik konfransın tövsiyələrinin icrasını təmin etmək məqsədilə Auditorlar Palatası tərəfindən Maliyyə Bazarlarına Nəzarət Palatası (MBNP) ilə razılaşdırılmaqla "Cinayət yolu ilə əldə edilmiş pul vəsaitlərinin və ya digər əmlakın leqallaşdırılması və terrorçuluğun maliyyələşdirilməsinə qarşı mübarizə üzrə təlim strategiyası və ona uyğun təlim Proqramı" hazırlanıb.
Auditorlar Palatası, Maliyyə Bazarlarına Nəzarət Palatası və "Headstart International" Tədris Mərkəzinin birgə təşkilatçılığı ilə noyabrın 30-da "Maliyyə əməliyyatlarında şəffaflığın təmin edilməsi üzrə təlim proqramı"nın təqdimatı keçirilib.
Auditorlar Palatasının sədri Vahid Novruzov qeyd edib ki, məqsəd korrupsiyaya qarşı mübarizənin gücləndirilməsinə və şəffaflığın artırılmasına xidmət edəcək bu proqram çərçivəsində müvafiq dövlət qurumlarının, kommersiya təşkilatlarının, ictimai birliklərin, bankların, holdinqlərin və sair mütəxəssisləri üçün kursların keçirilməsidir. O diqqətə çatdırıb ki, Auditorlar Palatası "Headstart International" Tədris Mərkəzi ilə sıx əməkdaşlıq edir. Yaxın vaxtlarda Tədris Mərkəzinin tədris kursları fəaliyyətə başlayacaq.
MBNP-nin baş icraçı direktorunun müavini, strateji xidmətlər departamentinin direktoru Asim Zülfüqarov proqramın əhəmiyyətindən danışıb. O qeyd edib ki, gələn ildən yeni mühasibatlıq standartlarına keçiləcək. Bunun üçün beynəlxalq qurumlarla əməkdaşlıq edirik. Maliyyə əməliyyatlarında şəffaflığın təmin edilməsi üçün bir sıra addımlar atılır. Bunlardan biri “Nağdsız hesablaşmalar haqqında” qanunun tam tətbiqidir. Bundan başqa, maliyyə sektorunun iştirakçıları korporativ idarəetmə standartlarına uyğun olaraq maliyyə hesabatlarını açıqlayırlar ki, bu da şəffaflığa xidmət edir.
"Headstart International" Təlim Mərkəzinin rəhbəri Seyid Əli bildirib ki, təmsil etdiyi qurum gələn ilin yanvarından Auditorlar Palatası və MBNP-nin nəzarəti altında cinayət yolu ilə əldə edilmiş pul vəsaitlərinin və ya digər əmlakın leqallaşdırılması və terrorçuluğun maliyyələşdirilməsinə qarşı mübarizə mövzusunda təlimlər aparacaq. 2010-cu ildən fəaliyyətə başlayan, müştərilərə maliyyə və mühasibatlıq, vergi uçotu, menecment və xarici dillər üzrə təlimlər təqdim edən "Headstart International" indiyədək Azərbaycanda 15 mindən çox tələbəyə təlim keçib.
Çıxış edən digər natiqlər proqramın korrupsiyaya qarşı mübarizədə, eləcə də şəffaflığın artırılmasında önəmli rol oynayacağını diqqətə çatdırıblar.
Sonra "Maliyyə əməliyyatlarında şəffaflığın təmin edilməsi üzrə təlim proqramı"nın təqdimatı olub.
1news.az