Fərhad Abdullayev: Müstəqil Azərbaycanın nail olduğu ən böyük nailiyyətlərdən biri Konstitusiyanın qəbul edilməsidir
Azərbaycanın daxili və xarici siyasət sahəsində, sivil, demokratik, dünyəvi dövlət kimi özünü beynəlxalq arenada sübut etməsi Azərbaycan Konstitusiyasının mütərəqqi və dəyərli sənəd olduğunu göstərir.
1news.az-ın məlumatına görə, bunu Azərbaycan Konstitusiya Məhkəməsinin sədri Fərhad Abdullayev Bakıda keçirilən ombudsmanların XIII beynəlxalq konfransında çıxışı zamanı deyib.
Azərbaycanın özünü bütün sahələrdə tam layiqli partnyor kimi göstərdiyini deyən F.Abdullayev ölkəmizin bütün böyük layihələrdə iştirak etdiyini, nüfuzlu tədbirlərə ev sahibliyi etdiyini bildirib.
“Müstəqil Azərbaycanın nail olduğu ən böyük nailiyyətlərdən biri Konstitusiyanın qəbul edilməsidir”- deyən Konstitusiya Məhkəməsinin sədri qeyd edib ki, Azərbaycan Konstitusiyasına iki dəfə dəyişiklik edilib, edilən dəyişikliklər yalnız insan hüquq və azadlıqlarının genişlənməsi ilə bağlı olub:
“Bu gün bizim Ombudsman təsisatı ilə çox sıx əlaqələrimiz var. Bir çox hüquqi, sosial, cinayət, mülki-prosessual qərarlarımız var ki, onlar Ombudsman tərəfindən sorğu ilə bizə müraciət əsasında qəbul olunub. Bu əməkdaşlıq davam etməlidir. Ombudsmanın fəaliyyəti olduqca müsbətdir. O vətəndaş və dövlət arasında çox aktiv mövqedədir”.
1news.az
