Azərbaycan tarı Budapeştdə səslənir
10 noyabrda Budapeştin Bela Bartok adına İncəsənət sarayında Azərbaycanın məşhur tarzəni Malik Mansurov, Macarıstanın Miskolç Simfonik Orkestri və məşhur Djabe caz qrupunun iştirakı ilə böyük konsert proqramı təşkil edilib.
1news.az –ın verdiyi xəbərə görə Djabe qrupu ilə azərbaycanlı tarzənin ənənəvi Bakı Caz Festivalından başlanan əməkdaşlığı artıq 10 ildir ki davam edir.
Yaranmasının 20 illiyini qeyd etməyə hazırlaşan qrupun CD disklərində Malik Mansurovun ifaları da öz əksini tapıb.
Qeyd edək ki, proqram ərzində Azərbaycanın tanınmış tarzəni, Respublikanın əməkdar artisti, Milli Konservatoriyanın İnstrumental Muğam kafedrasının müdiri Malik Mansurov xalq mahnılarımızı böyük ustalıqla səsləndirərək, Macarıstanın məşhur musiqiçiləri- Tamas Barabas, Attila Egerhazi, Szilard Banai, Zoltan Kovacs, Ferenc Kovacs, eləcə də, Miskolç Simfonik Orkestrinin 50 nəfərlik heyəti ilə birlikdə klassik musiqiləri tarda ifa edib.
Caz və klassik musiqinin sintezi, Azərbaycanın xalq mahnıları, Afrika musiqisi elementlərinin təqdim edildiyi konsertdə macar ictimaiyyəti nümayəndələri, yerli jurnalistlər, diaspora üzvləri, ümumilikdə, 300-dən çox qonaq iştirak etmiş və proqram böyük maraqla qarşılanmışdır.
