Konstantin Kosaçov: “G20 formatında Azərbaycan kimi iştirakçıların görünməsini alqışlayıram”

“Azərbaycan Prezidenti İlham Əliyevə dərin hörmət bəsləyirəm və hesab edirəm ki o, həm öz ölkəsi üçün, həm də Rusiya ilə ikitərəfli münasibətlərin inkişafı üçün çox iş görür”.

1news.az AZƏRTAC-a istinadən xəbər verir ki, bunu RF Federasiya Şurasının Beynəlxalq Məsələlər Komitəsinin sədri Konstantin Kosaçov bu sözləri Rusiyanın “Vestnik Kavkaza” informasiya agentliyinin studiyasında deyib. Böyük İyirmiliyin (G20) bu yaxınlarda Antalyada keçirilmiş sammitində Azərbaycan Prezidenti İlham Əliyevin iştirak etməsini alqışladığını bildirən siyasətçinin fikrincə, G20 formatının siyasətinin maraqlı cəhəti ondan ibarətdir ki, o, “rəngarəng və çoxqütblü dünya fəlsəfəsinin tərəfdarı olan yeni-yeni iştirakçıların dəvət edilməsi hesabına öz tərkibini, formatını, konstruksiyasını dəyişə bilir”. O deyib: “Mən G20 formatında Azərbaycan kimi iştirakçıların görünməsini yalnız alqışlayıram”.

K.Kosaçov Azərbaycanda rus dilinə münasibət mövzusuna toxunaraq qeyd edib ki, o, 2012-2015-ci illərdə MDB, xaricdə yaşayan həmvətənlər və beynəlxalq humanitar əməkdaşlıq məsələləri üzrə Federal Agentliyin (“Rossotrudniçestvo”) rəhbəri kimi, keçmiş sovet respublikalarında dil siyasətini və müvafiq təhsil proqramlarını müqayisə etmək imkanına malik olub. Senator deyib: “Səmimi söyləyə bilərəm ki, Azərbaycan bu mənada fərqlənir. Azərbaycanda başa düşürlər ki, rus dili bu ölkənin vətəndaşları üçün, onun əhalisi üçün təhlükə deyil, əlavə rəqabət üstünlüyü, onların imkanlarını genişləndirən vasitədir. Bu, çox müdrik və uzaqgörən siyasətdir”