Bakı-Aktau istiqamətində bərələrin hərəkət cədvəli məlum oldu
Qazaxıstanın Aktau şəhərində yeni Logistik Mərkəzin istifadəyə verilib. Dekabrın 1-dən etibarən Bakı-Aktau və əks istiqamətdə təkərli texnika (yük maşınları, avtobuslar, sərnişin maşınları və s.) və dəmir yolu vaqonlarının daşınması üçün gəmi-bərələr təsdiq olunmuş mütəmadi qrafik üzrə hərəkət edəcəklər.
1news.az xəbər verir ki, bunu “Azərbaycan Xəzər Dəniz Gəmiçiliyi” QSC-nin mətbuat xidmətinin rəhbəri Vüqar Sadıqov deyib.
Onun sözlərinə görə, Bakı-Aktau istiqamətində təkərli texnika və dəmiryol vaqonlarını daşıyan gəmilər həftənin hər çərşənbə axşamı və cümə günləri saat 12:00-da, Aktau-Bakı istiqamətində isə çərşənbə və şənbə günləri saat 23:00-da yola düşəcəklər (hava şəraiti ilə əlaqədar qrafikdə məcburi dəyişikliklərin edilməsi zərurəti olduqda, öncədən xəbərdarlıq ediləcək).
Vüqar Sadıqov bildirib ki, zərurət yarandığı halda, “Azərbaycan Xəzər Dəniz Gəmiçiliyi” QSC artan yük həcmlərinin daşınması məqsədi ilə, qrafik üzrə gəmi səfərlərinin sayını tələbata uyğun artıracaq.
Bakı-Aktau və Aktau-Bakı istiqamətində daşımalar Ələt qəsəbəsində yerləşən Bakı Beynəlxalq Dəniz Ticarət Limanından həyata keçirilir.
Bərə gəmilərinin səfərləri barədə, o cümlədən hava şəraitindən asılı olaraq gəmilərin limandan çıxış və təyinat limanına gəliş vaxtları haqqında məlumatlar onlayn rejimdə QSC-nin veb-saytında mütəmadi olaraq yerləşdiriləcək.
