Polşada Avropa Oyunlarına həsr olunmuş foto-albom nəşr olunub

Polşada “Bakı 2015” ilk Avropa Oyunlarına həsr olunmuş foto-albom nəşr edilib.

Azərbaycanın Polşadakı səfirliyindən 1news.az-a verilən məlumatına görə, Polşa Olimpiya Komitəsində təşkil olunan Olimpiya Ailəsinin Yeni il görüşü zamanı Komitə sədri Andjey Kraşnitskinin təşəbbüsü ilə ərsəyə gələn foto-albomun təqdimatı keçirilib.

Qeyd edək ki, albomda Avropa Oyunlarının təntənəli açılış və bağlanış mərasimlərini, yüksək standartlara cavab verən idman obyektlərini, İçəri Şəhəri, Qız Qalasını, Alov Qüllələrini, Bakının küçələrini, neft mədənlərini və Azərbaycan xalçalarını əks etdirən foto-şəkillər öz əksini tapıb.

Albomda həmçinin Azərbaycan Prezidenti İlham Əliyev, “Bakı 2015” ilk Avropa Oyunlarının Təşkilat Komitəsinin sədri Mehriban Əliyeva, Avropa Olimpiya Komitəsinin prezidenti Patrik Hikkinin də foto-şəkilləri yer alıb.

İlk Avropa Oyunlarının xoş anlarını, oyunlara hazırlığı, polşalı idmançıların nəaliyyətlərini və Bakı şəhərinin füsunkarlığını əks etdirən yüzlərlə foto-şəkillə yanaşı albomda eyni zamanda hər bir foto-şəklə dair şərh də qeyd olunub.

1news.az